Shillong, Jymmang 17: Ka Meghalaya Sarva Shiksha Abhiyan Schools Association (MSSASA) hynne ka sngi Balang, kala iakynduh ia u Myntri ka Pule Puthi Rakkam Sangma bad kila iasyllok halor bun ki mat kiba iadei bad ka bha ka miat bad ki jingeh kaba ki nonghikai SSA ka jylla kila mad.
“Ngi dap da ka jingsngewnguh ia u Myntri ka Pule Puthi bad ia u Symbud Myntri Rangbah ka jylla u Prestone Tynsong bad ia ka sorkar MDA kaba la shimkhia ha kaban pynurlong iaka jingdawa kaba la slem jong ki nonghikai SSA ha kaba iadei bad ka jingpyllait iaka tulop jong ki nonghikai da kaba phah ia ka tulop ha ki Bank Account jong ki nonghikai” ong u President ka MSSASA u Bah Aristotle Rymbai.
Ula ong, ka sorkar kala sdang pyntrei ia katei ka policy treikam ha u bnai ba la dep bad kumta iaka tulop jong ki Nonghikai SSA naduh u bnai Kyllalyngkot 2023 la phah beit beit sha ka bank account jong ki nonghikai.
Ula pyntip ba ka Association kala iakren ruh ban mang kham bun ia ka pisa na ka bynta ka Samagra Shiksha Abhiyan.
“U Myntri Sorkar ula pyntip ba kila dep ban shim ia ki sienjam ha kaba iadei bad katei ka bynta bad ka sorkar kala dep ban shim ia ka rai ha kaba iadei bad ka jingpynsahteng iaka tulop jong ki nonghikai. Ula pyntip ia ngi ba ki nonghikai kin ym mad jingeh bad ngi la ioh iaka jingpynthikna ba ka First Installment jong u snem mang tyngka 2022-23, ka sorkar pdneg kan sa phah la kumno kumno ha ka taiew ba kut jong u Jylliew ne ka taiew bas dang jong u Naitung” ong u President ka MSSASA.
U Bah Rymbai ula iathuh ruh ba ka sorkar jylla kala dep ban pynkhreh iaka bhah tyngka na ka bynta ban siew ia ka tulop jong ki nonghikai SSA bad ha ka taiew ban wan, ka tulop na ka bynta u bnai Lber yn sa pyllait noh sha ki nonghikai kaban kot kumba T.26-27 Klur.
U Bah Rymbai ula iathuh ruh ba ka seng kala pynsngew ruh ia kiwei ki mat kiba kynthup ban thung noh ia u Chairman bad ki dkhot jongka Meghalaya State Education Commission bad kumjuh ruh ban thung noh ia ki nonghikai ha ki kam ba lait ha ki skul SSA kiba don hapoh ka jylla.
