Shillong, Jylliew 17: Ka FKJGP Maweit Circle bad ka Maweit Unit ha ka sngi Thohdieng kila leit jurip iaka Primary Health Centre kaba don ha Maweit bad dap da ka jingsngewtynnad ba kane ka jaka ai jingsumar kala lah ban ai ka jingshakri kaba bha ia ki paidbah ka thaiñ.
Ia kane ka jingjurip la ialam da u Bah Anthony Umiong, President ka seng ryngkat bad kiwei kiwei ki dkhot ha kaba kila iakynduh ruh ia u Dr. M.Mazundar u nongpyniaid katei ka jaka sumar bad ka Seng kala ai ka jingiaroh iaka jingtreikam bad ka trei shitom jong u Doctor ryngkat bad ki nongtrei baroh haduh ban da ioh khur iaka khusnam kum kawei naki PHC ba iaid beit hapoh ka jylla khamtam eh haba u Doctor u ju noh synñiang nalade ban pynbiang iaki tiar hapoh ka PHC.
Ka Seng ka pynpaw ka jingsngewdiaw bad sngewkhia iaka jingleh meinah bad ieh shrah ka sorkar ia katei ka jaka sumar hapoh ka thaiñ naduh ka surok ban rung sha hospital, ka um, ka jaka pynieng kali, ka bording elektrik bad ka jing jot rathai katei ka jaka sumar khamtam ha ki por slap ha kaba baroh ki kamra jong katei ka PHC ki nongtrei ki hap ban kup shatri wat hapoh kamra ruh namar ka jingjaw ka um.
Ka Seng ka kyntu iaka sorkar bad ka tnad ba dei peit khamtam ia u Myntri Rangbah ka jylla u Conrad Sangma uba la kular ban kyntiew kyrdan sha ka CHC haka por ba u wan ha Maweit ba ym dei ban kular tang ka ktien ban iohnong politik hynrei ban phaikhmat lem sha katei ka jaka sumar ban pynbiang mardor iaki jingdonkam ba kyrkieh jong katei ka jaka sumar hapoh ka thaiñ khnang ba ki Doctor, ki nongtrei bad ki nongpang kin ioh iaka jaka sumar kaba kham bha kum ba long lem kiwei ki jaka sumar hapoh ka jylla.
Pule lang ia kane: Taplup ka khyndew ia 2 ngut ki Dkhot ka Tarari Choir ha ka jingtwa khyndew ha Nongstoin
