Shillong, Nailur 13 : Ka Bharatiya Janata Party (BJP) ka la pynpaw ia ka jingsngewsih kaba jur halor ka jingkhlad noh jong u Myntri Rangbah barim ka Jylla Dr. Donwa Dethwelson (DD) Lapang uba ju khot ieit kum u ‘Maheh’.
U Dr Lapang, u riew pawkhmat ba radbah ha ka sain pyrthei jong ka Jylla Meghalaya, u la long kum u Myntri Rangbah ka Jylla haduh saw sien naduh u snem 1992 haduh u snem 2010 bad hadien kum u Chief Advisor jong ka sorkar haduh u snem 2024.
Ka seng ka la niew ia u Dr Lapang kum u riew sain pyrthei uba pawnam, u nongialam paidbah, bad u nonghikai uba la aiti ia ka jingim jong u ha ka kam shakri paidbah. Ka jinglong nongialam ba jngai jngai jong u, ka la don ka bynta kaba kongsan ha kaba sain dur ia ka lawei jong ka jylla, kynthup ruh ia ka jingthaw ia ka Ri-Bhoi district. Ka jinglong rit mynsiem, ka jinglong hok, bad ka jingkut jingmut jong u Dr Lapang ka la pynlong ia u ban ioh ia ka jingburom bad jingsngewnguh kaba kylleng kylleng.
U Nongaiktien Rangbah ka BJP, Bah Mariahom Kharkrang, ula ai burom ïa u Dr. Lapang, da kaba ong, “Mynta, ka jylla Meghalaya, ka la duh noh ïa u riew sain pyrthei u paidbah, u nongïalam paidbah ba shisha, u nonghikai, u kpa, bad ka jingshai ba ïalam ïa ki pateng ban wan.”
U la ong ba ka seng ka duwai ba ka mynsiem jong u kan shongthait ha ka jingsuk bym jukut bad ka shim mynsiem na ki dienjat jong u, ka jingthmu, bad ka jingdon burom jong u ban trei na ka bynta ka Meghalaya kaba kham bha.
 ka la pynpaw ia ka jingsngewsih kaba jur halor ka jingkhlad noh jong u Myntri Rangbah barim ka Jylla Dr. Donwa Dethwelson (DD) Lapang uba ju khot ieit kum u ‘Maheh’.){kind=link}