Nongpoh, Nailur 28 : U Chief Executive Member (CEM) ka Khasi Hills Autonomous District Council (KHADC) Bah Pyniaid Sing Syiem, hynne ka sngi Palei, ula pynpaw ia ka jingsngewkhia halor ka jingthmu wan pynpra ki nong Assam ia ka top um jong ka project JJM ka Shnong Barapathar, kaba don ha khappud ka Ri-Bhoi bad Assam.
Kum ban shu pynkynmaw, ki nong Assam bala lamkhmat da arngut ki khar Muslim kila pynmih ia ka jingkulmar halor ka jingai jaka jong kawei ka Longkmie Khasi ia ka Dorbar Shnong ban shna ia ka top um jong ka skhim JJM ba ai na ka Sorkar Meghalaya.
Kine ki briew kila byrngem byrsit ruh ia kane ka Longkmie bad thmu ruh ban pynpra ia kane ka top um. Na ka liang ka Longkmie bad ka Dorbar Shnong kila ujor da ka ejahar sha ki Pulit pyrshah ia kine ki arngut ki bar Jylla.
“Kum u CEM nga sngewkhia jur ba mih ki huri hura ha ki shnong khappud khamtam ha kane ka shnong (Barapathar) tang namar ka jingwan ki kam pynroi ki ban ai jingmyntoi ia ki paidbah” ong u Bah Pyniaid.
U CEM u pyntip ruh ba ula dep iakren ia kane ka jingjia bad u Symbud Myntri Rangbah ka Jylla Bah Prestone Tynsong uba dei ruh u Chairman ka Regional Committee iapynbeit khappud ba khmih ia ka Ri-Bhoi, ka ban sa iakynduh shen bad ka Regional Committee na Assam ban iakren pynbeit ia u pud u sam ba thikna ki ar Jylla.
“Kum u CEM uba donlang ha ka Committee nalor u EM bad MDC ka thain, ngin sa rah iakren ia kane ka kam hapoh ka jingialang jong ki Regional Committee” ula ong.
U Bah Pyniaid u pyntip ba ka jingialang ba khatduh jong ki Regional Committee ba long shen ha Guwahati, kila rai pynlong ia ka jingleit jurip ia ki shnong ki thaw kiba don hapoh ka jingiakren pynbeit pud bad ha kane ka jingjurip yn sa shim rai ia kaba donkam.
U ong ba lada shuwa kane ka sngi, lada don kino kino ki jingjia, ka Committee kan sa bthah ia u Deputy Commissioner ba un peitngor bad ban pynbeit ia ki jingkynad baroh.
Pule lang ia kane: Saphriang ka Video ba shah shoh ka samla NE ha u trai ka Spa ha Gujarat
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
