Shillong, Jymmang 03 : Ka NEIGRIHMS Faculty Association (NFA) ha ka sngi Thohdieng, kala pynpaw ia ka jingsngewkhia halor ka jingwan pynlong jingiakhih jong ki kynhun Sengbhalang hapoh ka phyllaw jong ka Institute ha kine ki khyndiat bnai bala leit noh.
Ha ka kyrwoh, ka Associaton kala ong “Watla ngi burom ia ka hok ban pynpaw bad ka jingiakren da kaba jai jai, ka jingjied ia ka jaka bad ka rukom pynlong ia ka jingiakhih kala pynsngewkhia jur bha”.
“Ka Campus ka dei ka jaka kaba ki briew kila wan ban ioh ia ki jingkoit, ki jinghikai bad ka jingiada. Kino kino ki kam kiba ktah ia ki jingsumar, pynthut ia ka pule dangle, lane buh jingma ia ka jinglong ka suk a sain dei ban khmih bad shimkhia bha. Ngi sngewkhia ba kum kine ki jingiakhih-khamtam haba ki shim ia ka lynti ban pynthut ia ka jingtreikam ka Ophis lane pyrrkhing ia ka leit ka wan, ka lah ban iapein bad ka mission jong ka Institute bad ka kamram ba ka dei ban ai sha ki paidbah”.
“Kum kine ki kam hapoh ki jaka sumar bad jaka pule khlem pep ki wanrah ia ka jingsngew syier bad rit mynsiem. Ka don beit ka jingktah ia ka rukom sumar ia ki nongpang, pynthut ia ka jingai jinghikai bad jingpule bad buh ka jingma sha ka jinglong ka suk ka sain hapoh ka phyllaw” kala bynrap.
Ka Association kala ong ba ka jingdon jong ki jingiakhih hapoh ka hospital bad ka jaka pule ka ktah ym tang ia ki nonghikai hynrei ia ki samla pule, ki nongpang bad ki nongtrei, ha kaba bun kila don lypa ha ka jingsngew syier.
“Ngi ngeit ba kum kine ki jingiakhih kim dei ban long hapoh ka phyllaw bad ki dei kiba ktah ia ka jingkiew shaphrang jong ka Institute” kala ong.
