Shillong Naiwieng 30: Ka Meghalaya Joint Council of Trade Unions & Associations kala pynpaw iaka jingsngewkhia halor ka jingbteng ka jingiakhih hapoh ka skulbah NEHU kaba la palat ia ka 3 taiew tam.
“Ka long kaba sngewsih shibun ban iohi ba ka jingiakhih kaba dang iaid shakhmat da ki samla pule jong ka NEHU kaba la palat ia ka 3 taiew. Ka long kaba pynduh mynsiem bad kaba pynsngewsih ia ngi ban iohi kumno ki samla pule kila hap ban shim ia kum katei ka sienjam kaba tyngeh da kaba shah thngan” la pynpaw u President ka MJCTU&A u J. L. Das bad E. Lynshing General Secretary ka MJCTU&A ha ka kyrwoh khubor.
Ki nongialam ka MJCTU&A kila pynpaw ba kum katei ka jingiakhih kala mih kadei namar ba la thaw hi da u Vice- Chancellor uba mynta jong ka NEHU bad ka jingiakhih ka long ban pyrshah ia ka jingleh donbor jong ki bor synshar.
“Ngi kyntu ia ka bor kiba dei khmih ban shimkhia ia ka jinglong jingman kaba la pynthut bad kan ktah jur ia ka lawei jong ki samla pule” la pynpaw ka MJCTU&A.
Ka MJCTU&A kala pynpaw ruh ba ka ai ka jingkyrshan ia ki samla kiba la pynlong iaka jingiakhih bad ka kyntu ruh ia ka President ka ri bad ia ka sorkar jylla ban shimkhia mardor lem halor katei ka jingjia khamtam ia ki mat jingdawa khnang ban pynneh biang ia ka nam bad burom jong ka skulbah ha ka kyrdan kaba bha.
