Shillong, April 12: Ki nongialam Niam ka thaiñ shatei lam mihngi kiba don hapoh ka lama jongka United Christian Forum of NEI (UCFNEI) hynne ka sngi Balang kila pynpaw iaka jingkyndit bad jingsngewkhia haba ar ngut ki nongialam niam na Meghalaya kiba dei na ka Presbyterian Church of India (PCI), la kynnoh ba kila shah ktah kti bad shah kynnoh ba ki thmu ban pynkylla niam ha ka por ba ki leit jngoh ha ka jylla Bihar katkum ka jingkhot sngewbha jong ka Balang kaba don ha katei ka jaka ban rakhe iaka Jingmih pat u Jisu Khrist bad ki riewngeit kiba don ha katei ka jaka.
Katkum ka khubor ba khatduh bala ioh na u SP East Khasi Hills District la pyntip ba kitei ki ar ngut ki don ha ka jaka kaba shngain bad kin ioh ruh iaka jingiada na ki pulit katba ki dang wanphai sha la iing, la pynpaw u Nongaiktien ka UCFNEI u Allen Brooks ha ka kyrwoh khubor.
Ha kawei pat ka liang, ki nongialam niam kila pynpaw iaka jingsngewsih kthang halor ka jingpynpra ia ki 3 tylli ki iingmane hapoh ka East Manipur District kaba la jia marmar hadien ka jingrakhe iaka Jingmih pat u Trai Jisu Khrist ne ka Easter Sunday, kaba long ruh ha ka sngi ba kut ka jingtreikam ka status quo bala pynmih da ka Iingkashari Manipur High Court.
Pule lang ia kane: Jah rngai u samla ha lynti na Nongstoin sha Shillong
U Brooks ula pynpaw ba ka UNCFNEI ka kyntu ia baroh ki riewngeit ba kin bteng ban buh ha ki jingduwai na ka bynta ban don ka jingshongsuk bad jingshongshngain ha ryngkat bad ieng tylli lang kawei.
