SHILLONG, Risaw 07: Ka Meghalaya Schools Welfare Development Association (MSWDA) ka sngewkhia halor ka jingpynduh kam iaki nonghikai contract kiba la shakri ha ki skul la bun snem bad ka pynrem ruh iaka jingsiat bom pynsat khmat haka por ba ki iakhih haka 6 tarik.
Ka MSWDA ka pynpaw ba kane ka jingleh ka long kaba khlem leh salonsar ha ka jylla baroh kawei kumba la paw ha ki lad pathai khubor ka pyni iaka jinglong arsap bad ka jingleh shilliang ka sorkar.
Ka Association ka pynkynmaw ba ka jingpynlong ia ka MTET ha ka jylla kadei ha u snem 2019, hynrei kaba sngewsih ka long ba ka ktah ia ki nonghikai kiba la don lypa.
“Ha ka jingshisha ka sorkar ka la dei ban pyrkhat bha ia ki nonghikai kiba lah don khamtam ia kiba la pyndep ia ka training (D.EL.ED lane B.Ed), namar ka MTET hi ka dei tang na ka bynta kito kiba dang kwah ban rung kam thymmai” la ong ka kyrwoh naka MSWDA.
Ka MSWDA ka pynpaw ba lada ka sorkar ka sngew donkam ba ki nonghikai ba la don lypa haka kam ka la dei ban pynlong kyrpang da ka special MTET naka bynta ki nonghikai da kaba ailad ruh ia ki ban pyndep hapoh ar snem ne lai snem.
“Kane ka jingleh syndet khlem da khein ia ka jingshakri jong ki ha ki por kiba kim pat don ia kita ki nonghikai kiba la pass ka long ka jingharam bad ka jingiuhroit ia ka hok jong ki khamtam kaba ktah ia ka jingim jong ki bad ka iing ka sem” la ong ka kyrwoh.
Halor kane ka MSWDA ka kyntu ia u Lamphang jong ka ing Dorbar Thawain bad na u president ka UDP u bah Metbah Lyngdoh bad ia ki nongmihkhmat jong ngi khamtam ki MLAs Khasi bad Jaintia ba kin tuklar ia kane.
