Shillong, Naitung 09: Ka Meghalaya State Commission for Women (MSCW) ka la pynpaw ia ka jingsngewkhia halor ka jingkiew ki jingjia shah thombor bad shah pyniap ki kynthei ha ki district bapher bapher jong ka Jylla Meghalaya ha u snem 2025.
Ka kyrwoh na ka Chairman ka MSCW Kong Iamon Syiem, ka ong ba ka Commission ka la shimkhia bad ka la buddien ia kawei pa kawei ka jingjia jong ki kam runar pyrshah ia ki kynthei.
“Ka Snem 2025 ka la sakhi ïa ka jingshah thombor bad shah pynïap ki kynthei ha ki District bapher bapher jong ka Meghalaya. Ka long kaei kaei kaba pynkulmar jingmut bad kaba pynpaw ïa ka jingduh noh ïa ka jingburom ïa ka jingim briew ha ka imlang sahlang jong ngi bad ka jingshngaiñ jong ki jaka paidbah bad ki jaka shimet na ka bynta ki kynthei bad ki khynnah jong ngi” ong ka Kong Iamong.
“Ka MSCW ka la shimkhia ia kine ki jingjia bad ka la buddien ia kawei pa kawei ka jingjia. Ka Commission ka pynrem ia kine ki kam thombor pyrshah ia ki kynthei bad ia ki khynnah rit jong ngi” ka la ong.
Ka Commission ka la kyrpad ïa ki nongshong shnong bad ki bor ba dei peit ba kin long kiba husiar bad ban pyntip lada iohi ia kino kino ki dak byrngem byrsit ne thombor.
“Ngi kyrpad ia uwei pa uwei u nongshong shnong, bad ki briew kiba donbor ban long kiba husiar bad ban tuklar bad ban ai jingtip pyrshah ia kino kino ki dak ba lah ban mih ka jingthombor lada ki jia ha ki Shnong ne ka jaka trei jong phi” kala ong.
Ka Commission ka la kyrpad ia ki nongthoh khubor bad ki nong don bynta haki rynsan social media ban long kiba don ka jingkitkhlieh bad kaba pyrkhat ia ka jinglong shynrang bad kynthei ha kaba ki ai jingtip ia ki mukotduma pyrshah ia ki kynthei bad ki khynnah.
Ka Commission ka la kyrpad ia ki paidbah ba kin pyntip ia ki jingthoh kiba jakhlia bad ban kiar na kaba kren ia ki jingkynthoh kiba jakhlia bad ki bym burom iaka long rynieng ki briew.
Ka Commission ka pan ia ka jingiatreilang bad ki nongshong shnong, ki bor synshar, bad ki lad pathai khubor ban thaw ia ka imlang sahlang kaba kham shngain bad kaba don burom.
