Shillong, Nailar 22: Ka Meghalaya Pradesh Congress Committee (MPCC) ka pynpaw ka jingsngewkhia halor ka huri hura dang shen ha Shillong bad ka jingiakynad kaba dang bteng ha khappud Assam-Meghalaya, da kaba ong ba ka Sorkar Jylla kadei ban shim ia ki sienjam kiba kham tyngeh ban pynneh ia ka suk ka sain.
Ha ka kyrwoh u president ka MPCC u Bah Vincent H Pala u la ong ba ki jingjia kiba dang shen ki la ktah ia ka jingshaniah jong ki paidbah bad pynthut ia ka iaid ka ieng jong ki paidbah kaba man ka sngi.
Ka Congress ka la kynnoh ba wat hapdeng ki dak ba ka lah ban mih biang ka jingkulmar hynrei ka Sorkar kam shym la ai jubab kaba biang shaka kynhun kaba lamkhmat iaka jingiakhih.
Ka MPCC ka la pynpaw ruh ïa ka jingktah jong ka jinglong jingman ïa ka kam jngohkai pyrthei bad ka ïoh ka kot jong ka thaiñ, da kaba ong ba kane ka jingiakhih kala ktah ïa ki hotel, home stay, ki nongpynïaid kali kamai, ki jaka bam, ki dukan bad kiwei kiwei.
Ka la ong ruh ba ka jingiakhih kala ktah iaka jingwan poi ki ba ki dawai, ki marbam, ki mar ba kongsan, ka jingleit shim shaki jaka sumar, ki nongtrei, ki samla pule bad baroh ki nongleit nongwan.
Halor ka jinglong jingman ha khappud Meghalaya-Assam, ka Congress ka la ong ba donkam ka jingiatreilang bad ka jingïakren hapdeng baroh ar ki Jylla lyngba ka jingshim iaki sienjam ki ban myntoi ia baroh ki nong shong shnong.
Ka MPCC ka la pynrem ia ka jingleh donbor, ka jingpyntieng bad ka jingpynjot ia ki mar ki mata daka ba ong ba ki bor ka ain ki donkam ban shim iaki sienjam ba tyngeh ban wanrah iaka suk ka sain kaba neh.
Ka la kyntu ia ka Sorkar Jylla ban pynioh biang ia ka jingshaniah jong ki paidbah, ban pynthikna ia ka jingwan poi ki marbam, ki mar ba donkam khlem ka jingshah thut, ban ai ka jingpahara kaba biang ia ki nongleit nongwan bad ban weng ia ki jingeh hapdeng ki nong shong shnong jong bar ar tylli ki Jylla lyngba ka jingiakren bad jingiatreilang.
