Shillong, Iaiong 11: Ka Khasi Jaintia Church Leaders’ Forum (KJCLF) hynne ka sngi Hatmajai kala pynpaw iaka jingsngewkhia halor ka jingjia ha Bihar ha kaba ki nongialam niam Khristan kiba kynthup ia u Pastor bad u Tymmen Basan kila mad iaka jingpynibor kaba lah ban buh ia ki ha ka jingma kaba khraw.
“Ngi la buh ha ki jingduwai bad jingiakren na ka bynta ka bha ka miat bad ka jingshngaiñ bad ngi sngewnguh ba kam shym la don kano kano ka jingma iaki bad ngi la ioh pdiang ruh ia ki jingtip ba kin wanphai iing noh” ong u Secretary ka KJCLF u Rev Dr Edwin H Kharkongor ha ka kyrwoh khubor.
Ula ong ba ka KJCLF ka pynrem jur ia kano kano ka jingleh donbor pyrshah ia ki nongialam niam khristan kiba trei ia ki kam mishon bad ka pynpaw iaka jingsngewnguh ia ki bor sorkar jong ka jylla Bihar bad Meghalaya kiba la iakren mardor ban pynbeit ha ka rukom kaba dei ia katei ka jingjia.
Ka Forum kala kyntu ruh ia ki nongleh social media ba kin kiar ha kaban pynsaphriang ia ki khubor kiba lah ban ialam sha ki jingjia ki bym sngewtynnad bad ka Forum ka kyntu ruh ia kiba trei ha ki kam mishon ha kiwei pat ki jylla, ba kidei ban long kiba tip bad sngewthuh iaka jinglong jingman ha ki trei ia ka kam mishon ka jongki ha kylleng ki bynta jong ka ri.
Dang ha kine ki ar sngi u Myntri Rangbahduh ka ri u Narendra Modi ula leit hapoh ka iingmane ha ka sngi rakhe iaka jingmih pat u Trai Jisu Khrist, kumta ka Forum ka kyntu ia ki bor kiba dei khmih hapoh ka ri ba kin peit ba ka jingsuk bad jingkmen kan don haka imlang sahlang.
