Shillong, Iaiong 08: Ka kynhun Hanuman Jayanti Utsav Samiti, Shillong hynne ka sngi kala pynpaw ka jingsngewdiaw halor ka jingkyntait ka ophis u Deputy commissioner (DC) East Khasi Hills ban pynlong iaka jingiaid paidbah kum shi bynta ban rakhe iaka lehniam Hanuman Jayanti.
Lah ban kdew ba ka Shree Shree Hanuman Jayanti Utsav Samiti kala pan jingbit naka ophis DC East Khasi Hills ban pynlong iaka jinglehniam Hanuman Jayanti bad ban rakhe ruh iaka jingdap 50 snem ka seng haka 7 tarik mynta u bnai ha Hanuman Temple kaba don ha Luckier Road, Shillong.
Haba iadei bad kane ka jingpan jingbit, ka ophis u DC kala kyntait iaka jingpan jingbit ban pynlong iaka jingiaid paidbah da kaba kdew ba ka lah ban ktah ia ka shongsuk shongshngain.
Naka liang ka Hanuman Jayanti Utsav Samiti kala kyntait ruh halor ka jingshah kynnoh ba kane ka Samiti ka don jingiadei bad ka Vishwa Hindu Parishad (VHP) kaba la pynlong ka jingiaid haka 2 tarik mynta u bnai kaba hap ruh haka sngi U Blei ha kylleng ka nongbah Shillong.
Ka Samiti ka pynpaw ba kam don jingiadei bad kano kano ka kynhun ruh hynrei kadei ka seng kaba don bynta tang ban lehniam Hanuman Jayanti hapoh ka jylla.
Haba iadei bad kane ka jingshah kyntait ban pynlong iaka jingiaid paidbah, ka Samiti kala pynpaw ka jingsngewsih bad kala kam ruh ba kane kadei ka jingleh pyrshah iaka hok kito kiba ngeit ha ka lehniam.
“Ka Samiti bad ki dkhot kidei ki dkhot ka jylla bad ki burom iaka jinglong kyrpang ki paidbah ka jylla bad ki ju don bynta lang bad ki paidbah naka bynta ban trei naka bynta ka bha ka miat ki paidbah bad ka jylla, hynrei kane ka jingshah kynnoh ba ka Samiti ka don bynta lang bad ki kynhun shit niam ka long ka jingshah pynjah burom iaka Samiti bad iaki dkhot” la ong ka shithi bala phah shaka Ophis DC.
