Shillong, Rymphang 27 : Ka Voice of the People Party (VPP) kala pynpaw ia ka jingsngew skhem ba kan jop biang ia ka Shillong Lok Sabha seat ha ka elekshon shiteng samoi, ong u President ka VPP bah Ardent Basaiawmoit ha ka sngi Thohdieng.
“Ngin dang ban rai (halor u kyrtong), hynrei ngin sa iakren shen ia kane ka kam” ula ong.
Une u Nongialam ka VPP ula pynpaw ba ka party kam donkam satia ia ki briew ba nabar ba kin jop ia ka elekshon shiteng samoi haba kynthoh ia ki jingiakren shane shatai.
“Nga iathuh ia phi, ngi don bun ki briew ha ka party kiba la biang ka kyrdan, kiba sngewthuh ia ka nongrim, ka thymmei jong ka party. Ngam tharai ba ngi donkam ki briew ba nabar ka party ba kin iakhun ia kane ka elekshon”.
Ia kane ka elekshon shiteng samoi la pynlong hadien ka jingkhlad kyndit jong u MP ka Shillong Dr Ricky AJ Syngkon myn ha ka 19 tarik Rymphang.
