Shillong Lber 10: Ka phlim “The Blood and the Border” kaba dei shaphang ka kolshor u Khasi kaba la pynmih da u Bah Wanphrang K Diengdoh yn sa pyni ha ka Portland Hall ha London ha ka 14 tarik u Lber.
Ia kane la pyntip da u Myntri Rangbah ka jylla u Conrad K Sangma ha ka sngi Thohdieng hapoh ka iing dorbar thawain ka jylla, “Kane kadei kata ka jingpyni bad ka jingkyrshan kaba ka Meghalayan Age Limited bad ka Tnad Tourism ym tang ba kala leh ia u Bah Wanphrang hynrei ia bun ngut ki nongshna phlim, ia kaba ngi lah kyrshan pisa mynta khnang ba kin lah ban pyni ia ka histori, buh ha ki rekod ia ki kolshor bapher bapher”.
“Kam dei kaba ngi shu iakren. Kine kidei kita jingleh kiba shisha kaba ngi la pyni. Ka shim por. Ka jinpynwandur ia ka khana jong ka phlim kala shim por haduh 2-3 snem ban shna. Kumta, ki don bun ngut ki nongshna phlim, kaba ngi lah ai jingkyrshan bad ka long ka khyllipmat jong ka jingsngew sarong ia ngi kum ki nong Meghalaya bad ia ka kolshor bad ia ka histori jong ki briew, yn pyni nam hapoh London,” la ong u Conrad Sangma.
U Myntri Rangbah ula kdew ruh, ba ki don ki briew kiba kynthoh ia ka sorkar ba ka pynlong ia ki Concert bad ban wanrah ia ki nongrwai kiba na shabar. “Kine kidei ki jingkynshew tyngka kiba kongsan kiba donkam ban leh. Kata kadei ka rukom kaba ka ioh ka kot ka mih na ka jingpynlong ia ki Concert”.
“Ngi donkam ia ka USP ne u nongrwai uba pawnam ban khring bad ka jinglong jingman baroh jong ka kam pynmih jingrwai kan kiew shaphrang, kadei ka rukom iaid lynti. Uwei ym lah ban peit ia katei ka tamasa bad ong balei ngi siew ia kane namar ba kadei shi bynta jong ka jingthmu kaba iar hynrei lada kadei tang katei thik kata jingleh, kumta ka dur bad ka rukom shim ia ka sienjam kan long ka bym pura” ula ong.
Hapoh jong ka Meghalaya Grassroot Music Programme (MGMP), u Myntri Rangbah ula ong ba ka sorkar ka siew kumba T.17.5 Klur sha ki 3,617 ngut ki nongrwai kiba la pyninam ha ki 7,621 tylli ki rynsan kiba la pynlong ha kylleng jong ka jylla ha kine ki 3 snem kiba la dep.
“Nga pynthikna hapoh ka iing dorbar, ia ki bad ia kiba bun ki nongrwai, ba ka thong ka jong ngi ka long ban poi sha ki 43,800 ngut ki samla. Ngi kwah ban wanrah ia ki 43,800 ngut ki samla sha kane bad ban kyrshan ia ki, wat lada ka mut ba ngi hap ban pynlut arshah ne laishah ia ka jinglut jingsep, nga sngew ba kane kaba ngi leh kadei kaba don jingmut bha” ula ong.
Nalor kane u Myntri Rangbah ula ong, ba ka sorkar kala bei tyngka haduh T.10 Klur hapoh jong ka Hello Meghalaya da kaba kyrshan ia ki 450 ngut ki samla Khasi, Garo bad Pnar kiba dei ki ‘Content Creator’.
“Ka tem ka put, ka Arts & Culture bad ka jingshna phlim kam dei satia tang ka jingpynbyrngia, hynrei kaba lah ban pynmih ia ka ioh ka kot lyngba ka jongki. Ngi lah ban thaw ia ki kam ki jam na ki bad ngi la lah ban pyni, ba ngi lah thaw ia ki kam ki jam, ngin dang thaw bad ngin iai bteng ban bei tyngka ha kane ka bynta namar ba ki don ia ka sap ka phong kaba kyrpang bad ka lad ban iakhun bad kiwei pat kum ka jylla bad ki samla kiba don ha kane ka lain” ula ong shuh shuh.
