Shillong, Risaw 08 : Ki Heh ka Indian Embassy ha Ramallah ha ryngkat ka Embassy ka India ha Cairo, kila pynthikna ba ki 27 ngut ki nong Meghalaya ba leit pilgrim sha Jerusalem, Israel, kila poi suk sha Ri Egypt.
Kila pyntip ba kine ki nong Meghalaya kila don ha lynti sha Taba bad kin leit beit beit sha Cairo hashuwa ba kin kiew ia ka Liengsuin Omar Air, hadien ka jingia jngohkai ia ki jaka ha Egypt.
Haba pyntip ia kane, u Myntri Rangbah ka Jylla Conrad K Sangma ula ong “Ka jingpynmih ia ki (nong Meghalaya na Israel) ka long kaba jop lyngba ka jingshimkhia shisha jong ka Ministry of External Affairs (MEA) bad ka Indian Diplomatic Mission. Ki nongshongshnong na Meghalaya, kiba la sahkut ha ki jaka ba khie ka thma hapdeng ka Israel-Palestine, kila poi suk mynta ha Egypt.
“Ngi sngew heh mynsiem ban tip ba ki Ophisar ha kitei ki Ri kila pynthikna ia ka jingrung jong ki (nong Meghalaya) sha Egypt, bad pynthikna ia ka bha ka miat jong ki nongshongshnong jong ngi. Ka jingpyrkhat bad ka jingduwai kan dang iai bteng bad ki katba ki dang don ha lynti tad haduh ba kin da poi shala iing” ula bynrap.
