Gangtok, Nohprah 22 : Ha ka jingpynbna kaba heh bha, u Myntri Rangbah ka Sikkim Prem Singh Tamang ha ka sngi Palei ula ong ba ka Sorkar jong u kan thungkam ia uwei u dkhot jong kawei pa kawei ka Longiing ha Jylla lada ka wan biang ha ka bor hadien ka elekshon 2024.
Haba kkren ha ka jingialang ha Rolu, Namchi District, u Tamang ula ong ba ka Sorkar kan pyntreikam biang ia ka Old Pension Scheme, ka ban ai jingmyntoi ia palar 50,000 ngut ki nongtrei Sorkar bala shongthait kynthup ki Ophisar.
U Tamang uba dei ruh u President ka Sikkim Krantikari Morcha (SKM), ula pynbna ia bun ki SOP ban khring ia ki Kynthei bad ki Nongtrei Sorkar.
Ula pynbna ruh ia 100% ka jingpynkiew ia ka song jingiarap pisa sha ki Kynthei ka ban long haduh T.40,000 shisnem hapoh ka skhim Aama Scheme, kaba dei ia ki Longkmie ki bym don kam don jam.
