Gangtok, Iaiong 10: Ka iingdorbar Assembly ka Sikkim mynta ka sngi Nyngkong ka la khihwin, kata hadien ka mat kaba iadei bad ka jingiaumsnam ha Singtam, ha kaba u Lamphang Arun Upreti ula phah sei noh shabar ka iingdorbar ia kiba bun ki nongmihkhmat ka SKM kiba iashim bynta ha ka jingiania.
Mynta ka sngi, ka Sikkim Assembly ka la pynlong ia ka jingialang dorbar ba kyrpang ban pynshai ha kaba iadei bad ka jingpynrung ia ka Clause 4 bad 5 hapoh ka IT Exemption ia kaba la mynjur dang shen da ka Finance Bill hapoh Lok Sabha.
Na ka liang u Myntri Rangbah (CM) barim u Pawan Kumar Chamling u la poi sha ka jingiania kaba jur bad u nongialam jong ka iingdorbar u Prem Singh Golay namar ka jingiatai halor kitei ki artylli ki clause.U Golay u la pynpaw halor kiba buntylli ki jingjia bad halor ki jingpynbna da ka sorkar barim hadien ba la pynkhein ia ka kyndon 371F da ka sorkar barim hapoh ka jingialam jong u Pawan Kumar Chamling.
Kumta ruh kane ka la pynlong ia u Chamling ba un ieng bad poi sha ka jingiania kaba jur hapoh ka iingdorbar da kaba tur ruh shajan u nongialam jong ka iingdorbar ban pynpaw pyrshah bad ban pan ia ka jingpynshai kaba bniah.
U Golay u la kdew kyrpang ha kaba iadei bad ka Companies Act ba la mynjur ha u snem 2013 ia kaba ym shym la mynjur hapoh Sikkim namar ka long pyrshah ia ka Sikkim Companies Act 1961 kaba hap hapoh ka Article 371F. Ia u nongialam ka SDF u Pawan Kumar Chamling ruh la rah noh shabar da ki bor pahara ka assembly.
U Chamling u la pynthut ia ka jingiamir jingut jong u nongialam ka iingdorbar u Prem Singh Golay halor ka Clause 4 bad 5 jong ka IT exemption. Na ka liang u Chamling u la dawa ka jingpynshai kaba bniah hadien ba u la shah kyntait.
Haba kren sha ki lad pathai khubor shabar ka assembly, u Pawan Kumar Chamling u la ong, “La sakhi ba ym don ka synshar paidbah ha Sikkim.Kane ka sorkar ba mynta ka la pulomha baroh ki liang.Mynta, ki la phah sei ia nga napoh assembly haba Nga rah ia ka mat kaba kongsan.
Katba na ka liang u CM ka Sikkim u Prem Singh Golay u la ong, “U nongialam ka liang pyshah u Paban Singh Chamling um lah ban pdiang ia ki jingshisha bad dei na kata ka daw u la ialehkai drama hapoh Assembly.”
