Gangtok, Risaw 09: Palat 70 ngut ki briew kila iap bad 100 tam ki dang ah rngai ha ka umsaw jong ka wah Teesta, kaba la heh um kynsan kynsan naka jingbthei jong ka pung thah Lhonak ha ka step sngi Balang.
“Kila don 33 ngut bala thikna ba kila iap. Kumba 40 tylli ki metiap la ioh ban tam na rud ka wah Teesta ha kine ki hynriew sngi bala leit noh naka thain Jalpaiguri District ka West Bengal. Napdeng kine, 10 tylli ki metiap ki dei kiba la ithuh” ong ka khubor Sorkar.
Palat 5000 ngut ki briew la ioh ban iarap bad leit shaw na North Sikkim ka bym pat lait lynti haduh mynta.
Ka khubor ka iathuh ba phra ngut ki shipai kila iap ha kane ka jingjia shlei um.
“Ka jingwad ia kiwei pat ki shipai ba jah rngai ka dang bteng. Napdeng ki 23 ngut, uwei ula lait im bad lap ha ka 4 tarik Risaw.
Haduh 8 tylli ki met la lah ban pynithuh mynta” ong ka kyrwoh na ki shipai.
Ki shipai ka TriShakti Corps kila ai ka jingiarap ia ki 1700 ngut ki nongshangkai pyrthei kiba sahkut ha ka thain Lachen, Lachung, Thangu bad Chungthang kiba don ha North Sikkim. Nalor kata, kila pynbiang ruh ia ka bam ka dih, ka dawai dashin bad kiwei kiwei ki jingdonkam.
Ka suinbneng hi kam pat khuid bha ha ka thain kaba la buh ha ka jingeh ia ki bor shipai ban leit shaw ia ki nongshangkai pyrthei kiba sahkut.
Palat 1200 tylli ki iing kila julor ha kane ka jingshlei um, kaba la rong ruh ia ki 13 tylli ki jingkieng jong kane ka Jylla.
