Shillong, Jylliew 25 : Ki shipai Border Security Force (BSF) la kynnoh ba kila ther da ki phew kuli sha suin mynta ka miet hajan ka Shnong Umsyiem, hadien ba mih ka jingiakynad bad ki paid nongshongshnong jong ka thain.
Kat kum ka khubor ba iathuh, ba kane ka huri hura kala sdang hadien ba ki shipai BSF kila pynthut ia ki briew kiba mut ban leit sha Dawki hynne ka janmiet Sngi U Blei.
La iathuh ba ki paidbah haba ioh jingtip ia kane ka jingkynnoh lehdonbor ki shipai BSF, kila iamih bad iatur sha ka ktem ki shipai kaba don hajan Umsyiem bad kala mih ka jingiatim iatla bad ia hylla kyrkow sha ki BSF.
La ong ba ki shipai BSF ruh kila iamih khrui na ktem bad kila siat da ki suloi sha suin ban pyntieng bad pynpra ia kine ki paidbah kiba wan tur sha ktem jong ki. Hadien kane, la kynnoh ba kila pyndonkam ruh da ki lathi bad tied naphang ia ki paidbah haduh ba bun ngut kila mynsaw.
Kat kum ka khubor ba ioh, kane ka jingpynibor jong ki Shipai kala mih hadien ka jingshah lun maw ka ktem kaba la pynlong ia ki shipai ban siat da ki ktang suloi sa suin bad ban bom lathi.
Kat haduh ba thoh ia ka khubor ym pat lah ban tip haduh katno ngut ki briew kila mynsaw na kane ka jingjia hynrei kat kum ki video bala ioh Ka Shlem ka pyni ba ki don ki briew kiba la mynsaw.
Pule lang ia kane: Aiti ka Sorkar ia ka song jingiarap ba T. 8 lak sha ka iing i Cafinia bad Maianylla
