Guwahati, Nohprah 06 : Ha kawei ka jingjia kaba pynher syrngiew, uwei u heh pulit constable mynta ka sngi ula siat iap iala u jong u paralok hapoh Sonari police station ha Charaideo district ka Assam.
Kane ka jingjia kala jia mynta ka step ha ka por kumba 9:20 hapoh Sonari police station.Utei u constable u dei uba la tip kyrteng kum u Deepak Kakoti uba la siat haduh lai kuli pyrshah iala u jong u para ba iatreilang u Gokul Basumatary uba dei hi u para constable.
U Basumatary ula khlad hashen ha kane ka jingshah siat, bad utei u pulit uba donkti ha katei ka kam thombor ula pyndem noh ia lade.
Hadien katei ka jingshah ther kuli la pynkit noh mar mar ia utei u lanot shapoh hospital hadien ba la pynbna da ki doktor uba la dep khlad noh.
Baroh kitei ki arngut ki constable ki dei na ka tnat 9th APBN.Halor kane ka jingjia la pynlong ruh ia ka jingtohkit khnang ban lap ia ka daw tynrai kaba la pynlong ia u Deepak Kakoti ba un siat iap ia u Basumatary.
Nalor kata la pynlong ruh ia ka medical check-up na ka bynta u Deepak Kakoti khnang ban lapdien la u don ne em hapdeng ka jingdih buaid ha katei ka por ba katei ka jingjia kala jia, ong u Yuvray uba dei u SP ka Charaideo district.
Iada ka daw tynrai halor kane ka jingjia ym pat lah ban tip thikna, hynrei la iathuh ba u Kakoti ula siat haduh saw kuli.
