Agartala, K’lyngkot 31: Shwa ka jingpynlong ia ka ilekshon assembly ha ka 16 tarik u Rymphang u ban wan ha Tripura, ka sorkar synshar BJP ka la mad sa kawei pat ka jingeh hadien ba sa uwei pat u nongmihkhmat jong ka party u Atul Debbarma ula iehnoh kam na ka Tripura Assembly bad na ka seng BJP hynnin ka sngi Nyngkong.
U Debbarma uba dei u doktor uba la kylla long u riewsain hima, watla katta u la leit ban thep kyrteng hynnin ka sngi Nyngkong ha Krishnapur assembly constituency kaba hapoh Khowai district kum u kyrtong shimet.
U Debbarma lem bad hynriew ngut kiwei pat ki sitting MLA ka BJP ki la shah weng na ka list jong ki kyrtong kiba la shah jied na ka bynta kane ka ilekshon ka ban long ha une u bnai u ban wan.Ha kane ka kynti ka sorkar synshar BJP ka la jied ia u Bikash Debbarma napoh Krishnapur assembly seat.
Na baroh ki 60 tylli ki assembly constituency, ka BJP ka la pynieng na ki 55 tylli ki seat, katba ka paralok synrop jong ka, ka Indigenous People’s Front of Tripura (IPFT) ka la pynieng na ki santylli ki seat kiba sah.
U Debbarma u ba dei MLA ba hynriew jong ka BJP bad 9 na ki nongmihkhmat na ka kynhun synrop BJP-IPFT u ban iehnoh kam napoh assembly kumjuh na ki party jong ki naduh ka snem 2021 u la ong ba ula shah weng noh na ka list jong ki kyrtong khlem kano kano ka jingpyntip sha u.
“Ha u 2018, Nga la iehnoh kam na ka tnat ka koit ka khiah napoh Delhi bad pyniasoh sha ka BJP bad shah jied napoh Krishnapur assembly constituency.Nga la pyrshang ban trei borbah na ka bynta ka bha ka miat jong ki paidbah.Lada Ngam iehnoh ia ka kam sorkar Ngan dang lah ban trei ia ka kam sa bun buntylli ki snem,” ong une u nongialam 59 snem rta.
Nalor kata u la ong ruh ba namar ka jingpynbor borbah da ki nongkyrshan ki jong u, kumta ruh ula mih noh na ka BJP bad leit thep kyrteng kum u kyrtong shimet.
Kham hashwa ki MLA ka BJP kiba kynthup ia u Diba Chandra Hrangkhawl, Burba Mohan Tripura, Ashis Das, Sudip Roy Barman bad u Ashis Kumar Saha bad ki MLA ka IPFT kiba kynthup ia u Mevar Kumar Jamatia, Brishaketu Debbarma bad u Dhananjoy Tripura ki la mih noh na ki party jong ki bad na ka assembly hadien ba kala mih ka jingiapher jingmut bad kine ki party synshar kumjuh bad ka sorkar.
