Shillong, Nailur 25 : Ka khynnah skul ba kam ba ka shah lute dang shen ha Nongthymmai, kala phla ba ka shu thok bad shu thaw khana namar ka jingtieng ba kala pynlut ia ka pisa ba T.300 da kaba ai sha ka paralok ban siew bai tiar online.
Ia kane la pyntip da u Superintendent of Police ka East Khasi Hills Bah Vivek Syiem uba la pynthikna ba ka jinglute kumba kam kane ka khynnah kam shym la jia satia.
U pyntip ba kane ka Khynnah kala phla ia kane ka kam shukor ha ka jingtohkit kaba bniah bad ruh ha ka jingshim jingthoh ban batai ia kaei kaba jia (statement) ha ka jingiadon ryngkat u Magistrate ha Iingkashari District Court.
Ka dei ha ka 25 tarik Nailar, ki Pulit ka Nongthymmai Beat House kila ioh pdiang ia ka ejahar ba pyntip ba kawei ka Khynnah kala shah lute pisa ba T.300 ha ki 4 ngut ki runar katba ka dang wan phai na skul ban leit sha Iing. Kala kam ruh ba uwei na kine ki runar ula pynap da ka tari ia kane ka Khynnah. La kam ba kane ka jingjia kala jia ha Lumiablot, Nongthymmai.
Ki Pulit kila register case ia kane ka ejahar hapoh ka Rynjah Police Station Case No. 258(8)2025 hapoh ka kyndon 309(4)/309(6)/351(3)/126(2)/3(5) bad 3(6) jong ka BNS.
U Bah Vivek u iathuh ba ha ka jingtohkit bad ha ka jingialam ai jingthoh ba batai iakaei kaba jia ha Iingkashari, kane ka Khynnah kala phla ba ka khlem shah lute satia bad ia ka pisa ba T.300, kala ai sha ka paralok ba kan siew ia ka bai tiar online. U ong ba namar ka jingtieng ba kala pynlut ia ka pisa, kala thaw khana ba ka shah lute.
Halor kane, u pyntip ba ki Pulit kin sa aiti ia ka kaiphod ba khatduh sha Iingkashari. Ula ong ruh ba ka jingai iaki jingtip ba shu thok (FIR) sha ki Pulit ka dei ka jingleh bymman bad ki Pulit ki lah ban pynngat ia kane ka khynnah ha ki kyndon ain.
