Shillong, Nailar 01: Ki nongshong shnong ka Elaka Labang Nangphyllut Pangam Raliang bala tip kum ka Block 1, kala dawa naka sorkar Meghalaya bad Assam ba kin shim khia ha ka ban thwet iaki kynhun kiengatiar khnang ban wan ka jingshongsuk shongsain hapoh ka thain Block I.
Kane kadei hadien ba ki paidbah kila pynpaw iaka jingsngewsyier halor ka jingmih jong ka kynhun Kaikhlaw thymmai jong ki Karbi kaba tip kyrteng kum ka United People Front of Karbi Longr (UPFKL) katkum ka kot khubor jong ki Karbi kaba mih haka 29 bad 30 tarik Naitung 2023.
Ka kyrwoh na u Chairman ka Hynniewtrep Border Disputed Redressal Forum (HBDRF) bah Chandame Sungoh ula iathuh ba katkum ka khubor bala mih haka 29 bad 30 tarik Naitung 2023, ki Pulit ka Manja Police Station Karbi Anglong kila kem ia 2 ngut ki dkhot ka kynhun UPFKL bala tip kum u Sanjay Ingtih bad Rajesh Phangcho naka shnong Jrikyndeng kaba dang hap hi hapoh Block 1.
U bah Chandame ula iathuh ba katkum kane ka khubor la iathuh ba na kine 2 ngut ba shah kem la ioh kurup shibun ki shithi dawa pisa haka kyrteng jong kane ka kynhun hynrei ym shym la iathuh ha ka kyrteng jong no la thoh ha kine ki shithi dawa pisa tangba la suba jur ba kine ki shithi ki lah ban don ki kyrteng jong ki Khasi-Pnar kiba sah ha Block 1.
“Kat kum ka jingtip kaba ngi la ïoh lyngba ki briew kiba ngi phah tohkit la ong ba kane ka Kynhun ka don kumba 500 ngut tam ki dkhot bad ka jingthmu jong kane ka seng ka long ban pyntieng pynsmiej ïaki paid Khasi-Pnar ba kin ym nud ban leit ban wan lane ban kren ban dawa ïaka hok jong ki ba kin don beit shapoh Meghalaya bad ban pynshitom ïaki haki rukom kumba ju jia haki snem 2000 ter ter” la ong ka kyrwoh.
U ban Chandame u pyntip “Ki paid nongshong jong ka Elaka Labang Nangphyllut bad ka Hynniewtrep Border Disputed Redressal Forum ka pyntip ïaki paradoh parasnam jong ka Bri U Hynñiewtrep bad ïaki para Sengbhalang baroh kiba don hapoh ka Ri Khasi Jaiñtia ba kin tip ban long kiba la khreh ban ai jingiarap ba lada ka ei ka ei kaba sniew ïaki paradoh parasnam”.
“Kum ki pait nongshong jong ka Labang Nangphyllut Pangam Raliang ngi kyrpad ïa baroh ki Khun Ka Bri U Hynñiewtrep ba da lei dalei kim dei ban iehbeiñ lada jia ki shah thombor ha kine ki kynhun kaikhlaw lane ki paid Karbi” ula bynrap.
Nalor kane ki paid nongshong bad ka Forum ki kyntu ruh ïaki paid Karbi ba kim dei ban thaw kum kane ka buit bymman ban wanrah iaka jingia umsnam lane sngewpher jait bynriew. Kum ki nongshong shnong ki kwah iaka shongsuk shongsaiñ bad lada ki Karbi ki dang ïai kynroi te kim ban se ban thawlad ban ïada ialade.
Naka liang ka Forum kan ym ailad ïaki Karbi kiba shong basah hapoh Meghalaya ba kin ïoh shongsuk shongsaiñ lada ki Khasi Pnar ba shong basah hapoh Karbi Anglong kin shah pynshitom bad shah lehbeiñ.
Kala kyntu ïaki Karbi ban long kiba ïa ieit markylliang bad burom markylliang khnang ba kan don ka shongsuk shongsaiñ kumba juh long naduh ki phew phew snem bala leit.
Kum ki pait nongshong shnong bad ka Forum ki ai ka jingiatrei lang bad ka Sorkar naka bynta ka jingpynkhreh ban pynbeit ïa u pud u sam bad ki kwah ba ki ar sorkar kin pynbeit ïa u pud u sam daka lynti ka jingsuk bad ki paid Khasi Pnar jong ka ne ka thaiñ kin ïoh ïaka hok jong ki.
