Nongpoh, Jylliew 10: Kum shibynta ban pynneh pynsah ïaka mariang bad kumjuh ruh ban pynneh pynsah ïaki jingthaw ba im ha um bad ha wah, mynta ka sngi ka Seng Samla Shnong Ïewmawlong ka la pynlong daka jingïakop ban lum ïaki plastik kiba la bret pathar da ki briew haka wah rit jong ka Shnong Ïewmawlong.
Ha Kane ka jingïakop ki nongïalam jong ka seng samla ka la buh ruh ia ka khusnam daka song pisa sha ki nongïawan ïashim bynta kiba ïoh tam bun killo ki plastic.
Kane ka jingbuh khunsam ka la pynshong shit ïaki khun samla kiba la ianiom sha ki wahduid ban ia tam bun kilo ïaki plastik. Ha kane ka jingiakop, ki 3 ngut nongjop ki ba la wan haka kyrdan nyngkong, baar bad balai ki la ïoh ban tam haduh 1 quintal tam.
Haba kut jong Kane ka jingïakop naka liang ka seng samla ka la ïoh ruh ban pynlait ïaki symbai dohkha ha katei ka wah rit daka jingthmu ban nang pynroi shuh shuh ïaki dohkha haki wah kiba don ha Shnong.
U Samla Aristone Ryndongsngi, President ka Seng Samla Ïew-Mawlong u la pynpaw ïaka jingkmen haba ïohi ba kane jingïakop tam plastik ka la wanrah ïaka jingkhuid jingsuba hapoh ka Shnong bad khamtam ha kane ka wah rit kaba don haka Shnong.
U la ïathuh ruh ba kane ka jingthep symbai dohkha ha kane ka wah rit ka dei kaba la leh da ka jingthmu jong ka Seng Samla ban nang pynneh ïaki dohkha haki wah, namar la ïohi ïaka jingduh jait jong ki dohkha tang naki daw jong ka jingpynjaboh jong ki briew ki bym shem la suitñiew ïaki jingthaw kiba im ha ki wah.
U Samla Aristone u la kyntu ruh ïaki paidbah ba kin nym leh jakhlia shuh ha kane ka wah bad ba kin sumar khuid ïaka khnang ba ki doh kin nangroi na kawei kapor sha kawei pat, bad ka jingmyntoi kan long ïaki paidbah nongshong shnong ha kaba kin ïoh ban khwai doh ban bam na kane ka wah.
