Shillong Naiwieng 18: Ki Lyngdoh ki Myntri bad ki basan bakhraw jong ka Hima Mylliem hynne ka sngi Thohdieng, kila pyndep ia ka Lehniam Iewduh ba shisien shi snem ryngkat ki jingknia jingkhriam bad ka duwai ka phirat ha u Nongbuh Nongthaw ba un kyrkhu ban roi ka kamai ka kajih bad ban bha ban miat ka Iewduh ha kane ka snem ba mynta.
Ha kane ka lehniam la wan ban sakhi lang da u Acting Syiem ka Hima Mylliem u bah Ainam Manik Syiem, ki Myntri, ki Lyngdoh, ki Basan, ki Bakhraw bad ki paidbah na kylleng.
Ia ka Lehniam Iewduh la pynlong da u 5 Kur u 11 kur jong ka Hima, kaba la sdang naduh u ‘Ni u Kong hyndai hynthai da kaba knia ia u Syiar Lamlynti bad u ‘Lang Iewduh kiba long ki nongiasaid na ka bynta ban ioh ia ka jingmap, ka jingkyrkhu kyrdoh ban bit ban biang, ka tip briew tip Blei, ban ioh ka kamai ka kajih bad ban bha ka ïew ka hat jong baroh kiba shong dukan ha Iewduh.
Hadien bala pyndep iaka lehniam lehrukom ha Khlieh Iewduh, ki Lyngdoh bad ki Bakhraw Batri jong ka Hima kila iahiar ruh sha Basa Tympew bad pynlong biang ia ka Nguh ka Dem ban ai Nguh ia u Blei Nongbuh Nongthaw hapoh kane ka Basa bad hadien bala dep ka Lehniam, la pynlong pat ia ka Shad ka Kmen ha kane ka Basa hashuwa ba kin kiew biang sha ka Duwan ha Khlieh Iewduh ban pynkut ia ka lehniam da ka shad ainguh ia u Lyngdoh bad ka Lyngdoh Sad.
Ha kine ki snem ba la dep, ka Hima Mylliem kam shym la ioh ban pynlong iaka lehniam Iewduh namar ka jingsaphriang ka khlam COVID-19 hynrei mynta ka kynti kala ioh ban pynlong biang ia kane ka lehniam lehrukom bad kala don ruh ka jingkhang iaka Iewduh ha kane ka sngi.
