Shillong, Jylliew 07 : Ka jingsheptieng bad jingrit mynsiem kala rung ha baroh ki samla pule ka thain Shatei Lam Mihngi ka Ri hadien ba ka kynhun ki shiparalok kala shah thombor ha ki runar hala ka jong ka Iingsah ha sor Bangalore, ia kaba la ngeit ba ka dei ka kam tuh kam thiem hynrei hadien la suba don kaei re kaei kaba sha lyndet.
Ka kynhun ki samla na Tura, Karbi Anglong ka Assam bad West Bengal, kiba iasah lang kum ki nongshongwai ha 3rd Cross, Pillapa Road, kila shah thombor ha ka kynhun ki runar trai shnong, kiba la leit rung jubor ha ka Iingsah jong ki bad shoh dusmon ia ki ha ka miet sngi Balang.
Kine ki briew kila lute lut ia baroh ki jingdon jingem kynthup kimobile phone, pisa bad ki kot ki sla kiba donkam.
Uwei na ki samla pule ba don jingiadei bad iajan bad kine ki lanot ula iathuh ba haba nyngkong, baroh ki dang mut ba ka dei ka kam tuh kam thiem hynrei ha ka jingpyrshang ban thombor biang ha ka sngi kaba bud, ka pyni ba ka dei ka kam kaba la leh da ka jingthmu eiei ha lyndet.
Uwei na kine ki samla ula mynsaw jur na ki shadem bad ka krung namar kane ka jingthombor.
U samla pule na shnong Tura Dakopgre ruh u dei uwei na ki lanot uba iasah lang ha kane ka juh ka iing
Ka dak kala paw shai ha ka sngi kaba bud namar kine ki juh ki runar kila wan phai biang sha kane ka Iingsah bad talain da ka daggar.
Ki samla pule kiba la sheptieng bha, kila set kut ialade hala iing bad hylla ia ki para marjan marpa, kaba pynlong ia kine ki runar ban phet krad na kane ka jaka.
Kine ki samla pule kila leit ban ujor da ka ejahar sha ki Pulit kiba la sdang ban pynlong ia ka jingtohkit.
