Shillong, Risaw 04 : Ka Khasi Students’ Union (KSU) ha ka sngi Thohdieng, kala pynlong ia ka jingiakhih da kaba iashong kyllain mungor ban pynbor ia ka Sorkar Jylla ba kan kyntiew kyrdan noh ia ka Mawsynram C&RD Block sha ka Civil Sub Division kaba pura.
Ki Nongialam bad dkhot ka KSU Sawsymper Circle, Balat Border Area bad Lawbah Border Area, kila iashimbynta ha kane ka jingiakhih kaba la pynlong ha madan Malki.
Kein noh ki kular jali jaum tang haki por ilekshon, pyni noh daka kam, kyntiew kyrdan noh iaka Mawsynram shaka Civil Sub Division’, ‘Kyntiew kyrdan noh ia ka Mawsynram CRD Block shaka Civil Sub Division, ne shim ka jingkitkhlieh lada ki paidbah ka thain kin nang pynjur iaka jingiakhih’,
Haba iakren bad ki nongthoh khubor, u President ka KSU South West Khasi Hills samla Forwardman Nongrem ula ong “ Ngi pynlong ia kane ka jingiashong kyllain mungor ban pyrshah ia ka jingsngap mynthi jong ka Sorkar ia ka jingdawa bala sahteng la slem bha jong ki paidbah ka Mawsynram ban kyntiew kyrdan ia ka Block sha ka Civil Sub Division”.
Ula ong ba ka Seng kala iakynduh na ka por sha ka por ia ka Sorkar Jylla hynrei kam shym la don satia kano kano ka jingshimkhia ban pynurlong ia kane ka jingdawa kaba la iaid mynta la 24 snem kata naduh u snem 2000.
“Ka Sorkar Jylla kala shu kular ia ki paidbah ka Mawsynram ban pynurlong ia kane ka jingdawa khlem da leh pat ia ka kam. Namar kata, la pynbot ia ngi ban mih bad pynlong ia kane ka jingiakhh ha Shillong ban pynbor ia ka Sorkar ba kan mynjur noh ha kaban pynkha ia ka Civil Sub Division ha Mawsynram” ula ong.
Nalor kane, u samla Forwardman ula ong ba ka Mawsynram Block kala dei ia kaban kyntiew kyrdan noh sha ka Civil Sub Division haba pynshong nongrim ia ka jingdon ki nongshongshnong. Kane ka Block ka dei kaba la pynkha la 62 snem mynshuwa.
“Ha u 2022, ka Sorkar kala kyntiew kyrdan ia ki katto katne ki C&RD Block-ha Dalu, Rongjeng bad Jengjal. Lada phi peit ia ka jingdon paid, kila jan kot kumjuh kum ka Mawsynram, kaba don ia ki nongshongshnong ba 50,000 ngut kat kum ka khana samari 2011. Hynrei hadien 12-13 snem, ngi khmih lynti ba ka jingdon paid kan tam ia ka 60,000-70,000 ngut” ula ong.
“Nalor kata, ka jingjngai na Dalu sha Tura ka long tang 30-32 km hynrei ka jingjngai na Mawsynram sha Shillong ka long 69km bad na ki shnong khappud, ka jingjngai kala tam ia ka 100 km” ong u samla Forwardman.
Une u Nongialam ka KSU ula pynkynmaw ia ka jingkut jingmut jong u Myntri Rangbah ka Jylla Conrad K Sangma ban wanrah shajan ia ka synshar khadar sha u paidbah bad ong “Hynrei, ka long kaba sngewsih ba kam don satia ka jingshimkhia na ka liang ka Sorkar ban pyurlong ia kane da ka jingbym lah ban kyntiew kyrdan ia ka Mawsynram Block sha ka Civil Sub Division ba pura”.
“Namar kata, ngi la rai ban shim ruh ia kiwei ki sienjam ban pynbor ia ka Sorkar Jylla ba kan pynurlong noh ia kane ka jingdawa kaba la slem jong ki paidbah ka Mawsynram” ula bynrap.
