Shillong, Risaw 10 : Ka Sorkar Jylla hynne ka sngi Ba-ar, kala pynlong ia ka jingiasyllok bad baroh ki Kynhun bapher bapher kum ka sienjam ban lah pynkhreh lypa ia ki lad jingiada na ka jingkhynniuh jong u jumai.
Kum shibynta jong ka State Level Mock Exercise halor ka jingpynjulor u jumai ka ban long ha ka 12 tarik Risaw, ka Meghalaya State Disaster Management Authority (MSDMA) ka Tnad Revenue ha ryngkat ka National Disaster Management Authority (NDMA) ka Sorkar India, kila pynlong ia ka Table Top Exercise hynne ka sngi bad ki Kynhun bapher bapher ha State Convention Centre, kaba la iashimbynta ruh da baroh ki bor District da ka kor Online.
Ka thong bad ka jingthmu jong ka Mock Exercise ka long ban bishar bha ia ka Disaster Management Plan bad ki Standard Operating Procedure (SOP) jong ka Jylla bad ki District bad ruh jong ki Tnad bapher bapher, kaba batai ia ki kamram bad jingbahkhlieh jong ki kynhun kat kum ka Indicent Response System (IRS), ban pynthikna ia ka jingiatreilang hapdeng ki Emergency Support Function (ESF), ban pynsngewthuh iaki paidbah nalor kiwei kiwei.
Lah ban kdew ba ka State Level Mock Exercise on Earthquake Disaster kan long ha ka 12 tarik Risaw ha baroh ki District ka Jylla.
Ia kane ka Table Top Exercise la pyniaid da u Sanjay Goyal, Commissioner & Secretary ka Tnad Revenue & Disaster Management ha ka jingiadonlang u Maj. Gen Sudhir Bahl (Retd.), Senior Consultant (ME & IRS), NDMA.
Ha kane ka Exercise, kala don ruh ka jingai jingbatai ba bniah da ka MSDMA, DDMA (East Khasi Hills), ka Tnad PWD (R&B) bad ka NDRF. Ki kynhun bapher bapher bad kumjuh ruh ki District kila pashat ia ki jingai jingmut halor ki jinglong jingman bapher bapher.
Haba kren ha ka jingialang, u Sanjay Goyal ula ban jur ba ka Meghalaya namar ba ka dei kaba Jylla kaba khynniuh bha u jumai, ka jingpynleit jingmut ba hakhmat eh nalor kiwei ki jingpynjulor ka mariang, ka dei beit halor ka jingpynkhreh ia kiei ki ban jia ha ka jingkhynniuh jumai.
Ula kyntu ia ki kynhun bapher baphe rba kin shimkhia bha ia ki exercise baroh bad ban tynjuh alade ba haduh katno ka Jylla kala pynkhreh ban tem ia kum kine ki jingjia.
