Shillong, K’lyngkot 17 : U Symbud Myntri Rangbah ka tnad PWD (Roads) Bah Prestone Tynsong ha ka sngi Thohdieng, ula lum ia ka jingialang bishar kam halor ka jingpyntre ia ki phra tylli ki project surok ba kongsan ka Jylla, kiba la mang palat T.5000 klur.
“Nga sngewtynnad ban pyntip sha phi baroh ba ka jingiaid ki kam ka long kaba biang bha” ong u Bah Prestone haba iakren bad ki lad pathai khubor hadien ka jingialang.
Ula kynthoh ba “Ym pat ju don ki Sorkar ha ka histori jong ka Meghalaya naduh u snem 1972 tad haduh mynta hynrei ka dei tang kane ka Sorkar naduh u snem 2018 haduh mynta kaba la wanrah ia kum kine ki project”.
“Kumta, ngi kwah ban pyndep lut ia baroh kine ki project kham kloi kat kaba lah namar kin long ka jingkyrkhu kaba khraw bha ia ki nongshongshnong bad ka Jylla” ula bynrap.
Kine ki phra tylli ki project ki kynthup ia ka Shillong Western bypass package 1 ba (12.8 kms) T. 620 klur, package II (11.90kms) T. 686 crore bad package III (13.55 kms) T. 562 klur, Shillong Dawki Road T. 1200 klur, surok Nongstoin-Rambrai-Kyrshai (33kms) T. 359 klur, surok Dainadubi-Darugre (40kms) T. 705.83 crore, Darugre- Williamnagar (36 kms) T. 801 crore , Tura-Dalu (51kms) T. 610 crore, , Tura Bypass T 943 crore bad kumjuh ruh ia ka High Speed Corridor na Mawlyngkhung (na Fly Over, Umiam Lake sha Panchgram ha Assam).
“I aka High Speed Corridor Project, ia mynta ka sorjamin bad jingiakren bad jingiapynbeit bad ki Rangbah Shnong ka dang iaid shakhmat. Ngin sa lah ban tip ia ka jingmang tyngka hadien bala pyndep ia ka DPR” ula ong.
Haba pynpaw ba ka jingioh jaka ka dei ka jingeh kaba khraw bala mad da kine ki project surok, u Bah Prestone ula ong “75% na kane ka jingialang bishar kam la pynlut por ban iakren halor ka kam iathied jaka”.
“Nga la bthah ia baroh ki tnad ba dei khmih ba kin pynsted bad pynkloi ia ka jingtreikam namar ngi kwah ban pyndep noh ia kine ki project kham kloi kat kaba lah bad kine kin long ki jingkyrkhu ia ka Jylla Meghalaya” ula ong haba bynrap “Kumba nga ong ngi don ia ki project kiba biang bha ha kylleng ka Jylla bad nga thikna ba hapoh kine ki khyndiat snem naduh mynta ngin sa iohi ia ka jingkylla ki ban sa wan hapoh ka Jylla Meghalaya”.
Haba kylli halor ka jingiaid jong ka project urok Shillong-Dawki, u DyCM ula ong “ Ka song I,II, IV bad V nga kmen ban pyntip sha phi ba ki kam kila iaid shaid shaid bad ba ihun hynrei ki don katto katne ki khep ba ki trai jaka ki on gem, phim lah ban leh, phi lah ban sangeh ia ka kam namar ngam shym pat ioh ia ka jingsiew jong ka bai jaka”.
U pyntip ba ia ka surok Shillong-Dawki yn sa pyndep noh hapoh u snem 2026.
“Iaka song III, ngim don satia ia kano kano ka jingeh, ka song-III ka dei ka Pynursla Bypass bad kane ka Bypass ia mynta, ka Sorkar India kala dep ban mynjur ia ka DPR bad kane ruh kala wan kumba T.564 klur” bynrap u Bah Prestone.
Halor ka jingkylli ia ka Corridor Expressway (High Speed Corrdior), u Bah Prestone ula pyntip ba kane ka surok kan poi shaduh sha Silchar bad ia kane ka project la mang ha ka mang tyngka ba kot T.25000 klur, kynthup ia ka jingthied jaka kaba treikam lang ha Assam bad ha Meghalaya. U pyntip ba tang ha Meghalaya la dep ban mang ym duna ia ka T.15000 klur.
U iathuh ba ka Sorkar India kala bthah ia ka Jylla ban pynthikna ba kan dei ka project kaba dep bad ba trei thymmai (ka ban nym iasoh bad ki surok bala don lupa).
 Bah Prestone Tynsong ha ka sngi Thohdieng, ula lum ia ka jingialang bishar kam halor ka jingpyntre ia ki phra tylli ki project surok ba kongsan ka Jylla, kiba la mang palat T.5000 klur.){kind=link}