Shillong, Jylliew 23 : Shisngi hadien ka jingtwa jong ka kynroh ka madan ialehkai PA Sangma Stadium, Tura namar ka jingjur jong u slap, u Myntri Rangbah ka Jylla Conrad K Sangma hynne ka sngi Thohdieng, ula shong bishar ia ka kaiphod bala aiti da ki Engineer bad ki Contractor jong ka project.
U Myntri Rangbah ula shong bishar ia kine ki kaiphod ha ryngkat ki Heh Ophisar ka Tnad ialehkai ka Jylla lem bad ka Tnad Public Works Department (PWD).
Ha ka sngi Palei, u Conrad ula pyntip ba hadien ka jingioh khubor ba twa ka kynron jong ka PA Sangma Stadium ha Tura, ki Ophisar kila hiar wut wut sha katei ka jaka ban pynkhuid ia ka khyndew.
Ula pyntip ruh ba ula dep bthah ia ki bor District bad ka Tnad ba kin pynlong ia ka jingtohkit kaba bniah bad ruh ia u Contractor ba un aiti ia ka kaiphod halor ki daw jong kane ka jingtwa.
Ha ka sngi Balang, u Conrad ula lum ia ka jingialang bishar kam bad ki Deputy Commissioner lem bad ki Tnad bapher bapher ban iakhmih ia ki jingjulor kiba la jia na ka jinghap u slap ba khlem sangeh kynthup ia ka jngduh noh ki mynsiem briew ha Jylla.
U Chief Engineer ka State Sports Council Bah BM Syiem ula iathuh ba ia kane ka project, ka Tnad Sports bad ka Sorkar Jylla kila iasoi ia ka MoU bad ka Hindustan Steel Works Construction Limited (HSCL)) ba kan pyntrei ia ka kam na ka bynta ka tnad.
Ula ong “Ha ka jingshisha,baroh ki kam ki dei kiba la pyntrei da ka HSCL bad baroh ki kam hangne la pyntrei da ka HSCL”.
Ula pyntip ba ula don ha kane ka madan ban khmih ba kum kine ki jingjia kin ym jia shuh bad yn lah ban iada noh nangne shakhmat.
Haba kren halor ka kam ka ban sa leh mynta ula ong ba ka jingtei pat ia kane ka kynroh ka long kaba donkam hynrei yn ym pat lah ban leh mynta namar ka jingjur u slap. Hynrei ula ong ba ia ka rai ba khatduh yn sa shim da ka HSCL.
U Jagdish Chelani, Deputy Commissioner ka West Garo Hills ula pynpaw ba ki bor District ki kwah ban ioh jingbatai na ki Engineer ba kumno kane ka kynroh jong ka PA Sangma Stadium ka khyllem hynnin ka sngi palei.
“Ban peit ioh don ka jingduna ne trei torti lane balei kane ka wna jia, ngi la khot ia u Chief Engineer ka State Sports Counil Bah BM Syiem bad ia ki borkhmih ka HSCL ba kin iawad ia ki daw” ong u DC.
Une u Khlieh ka District ula ong, ban tehlakam ia kino kino ki jingjia, ki bor District kin sa khang shuwa shipor ia ka surok ban iaid ban ieng ki kali ne ki briew bad yn sa pyntip ruh ia kane sha ki paidbah.
Ula ong ba ka jingtei pynbha bad jingtei pat ia ka kynroh kan sa sdang biang hadien ba kut ka aiom slap.
Pule ruh: Kem ka ANTF ia 2 ngut ki Nongkhaii droks, kurup heroin ba T. 2 lak
