Shillong, 13th June 2025: U Lamphang ka Iingdorbar Thawain ka Jylla u Thomas A. Sangma, ula lum ia ka jingialang bishar kam ha ka Conference Room jongka Assembly Secretariat, Khyndailad, ban khmih bniah ia ka jingiaid shakhmat jong ki kam ba iadei bad ka jingtei ia ka Iingdorbar Thaw Ain kaba thymmai ha Mawdiangdiang.
Ha kane ka jingialang la wan iashimbynta da u Myntri Rangbah ka Jylla u Conrad K. Sangma, ki Symbud Myntri Rangbah ka jylla kiba kynthup ia u Bah Prestone Tynsong bad u Bah Sniawbhalang Dhar, u Chief Secretary ka jylla u Bah D.P. Wahlang, bad kiwei kiwei.
Ka jingialang kala pynleit jingmut ha kaban khmih bniah ia ka jinglong jingman, ban ithuh ia ki jingeh bad ban pynjanai ia ka rukom treikam ban pynthikna ba dei ban shna pyndep ha ka por kaba la buh ia katei ka jingtei kaba donnam.
Haba iakren bad ki nongpathai khubor hadien ba la wai ka jingialang u Thomas A. Sangma ula ong, “Kane ka jingialang ka long ban khmih ia ka jingiaid shakhmat jong ki kam. Ngi lah shim ia ki sienjam ban pynthikna ba dei ban pyndep ha ka por kaba la buh hynrei ngi iengskhem ruh ban pynthikna ba ka rukom treikam pat kadei ban pynneh ia ka kyrdan ha ka rukom trei. Ngi ngim lah ban pdiang ban shu leh kyrkieh bad ban iapein noh”.
“Ka Assembly building kam dei satia ka jingtei kaba la shu shna kumto. Ka don bun ki bynta, kaba kynthup ia ka Security, Audio-Visual, Acoustics, Interiors bad Carpeting. Ngim lah ban shaniah tang ha uwei ban shim ia kane ka kam. Bun kiba la shim ia kane ka kam kidei ban iatreilang ryngkat bad ngi lah mynjur ba kin don ia ka jingiatreilang bad ban iarap ruh mar kylliang ha man la ki khep”.
Ha kaba iadei bad ka jingbuh por, u Lamphang ula batai ba ka kynhun kala treikam katkum ka jingthmu kaba la buh hynrei ula kubur pat ba kila pat ban mih katto katne ki jingeh.
“Ngi lah iaid ha ka lynti hynrei katto katne ki jingeh ki lah ban mih. Ngi lah phikir bha khamtam ha kaba iadei eh bad ka Security bad Acoustic. Nuksa, ka jingjaw slap kala pyni ba kala don ka jingsawa ha ka tnum bad ngi iengskhem ban ngin pynbeit noh ia kane. Ngi ngin sa wanrah ruh ia ki riewshemphang ban lah ban shimkhia ia kitei ki jingeh mardor”.
Ha kaba iadei bad ka jingkhmih lynti ban pyndep ia ka jingtei, u Lamphang ula ong “Ngi lah kyrpad ba ia ki nongtrei dei ban pyntrei noh ha ki 3 tylli ki wat ne Shift ban pynkloi ia ka kam khlem da iapein pat ia ka jinglong jingman jong ka kyrdan kaba dei ban leh. Ki Designer bad ki Contractor kila buh por ba ki lah ban donkam sa 6 haduh 8 bnai ban pyndep”.
Ha kaba iadei bad ka jinglut jingsep jong ka Project, ula pynthikna da kaba ong,
“Ia mynta, ngim pat pynkylla eiei na ka bhah tyngka kaba la dep ban mang. Watla yn ym lah ban kiar ba ka lah ban don shuh ka jingpynlut, hynrei ngi dang ialeh beit ban don hapoh jongka jingbuh dor kaba la buh naduh ka por kaba sdang”.
U Lamphang ula pynkut da kaba iengskhem ba ka Assembly Secretariat kan pynthikna ba ia ka jingtei kaba thymmai kan kynjoh sha ka kyrdan kaba heh ha kaba iadei bad ka jingshngain, ka jingtreikam bad ka jingdon ia ki jingpynwandur ki bapher bapher.
