Williamnagar, Jylliew 28 : Ka MP ka Tura Agatha K Sangma ha ryngkat u MLA bad Myntri Sorkar Marcuise N marak kila lum ia ka jingialang shong bishar kam halor ka jingpyntreikam ia ki skhim bapher bapher ka Sorkar Pdeng ha East Garo Hills hynne ka sngi Balang.
Ia kane ka jingialang la pynlong hapoh ka jingpyniaid jong ka District Development Coordinaton and Monitoring Committee (DISHA) kaba la wan iashimbynta da ki Heh Ophisar jong ki Tnad bapher bapher kynthup u Deputy Commissioner ka East Garo Hills.
Kawei na ki skhim bala iatai sani bha ha ka jingialang ka dei ka Pradhan Mantri Awas Yojana-Gramin (PMAY-G). Halor kane, u Marcuise ula pynpaw ia ka mat ba ki don katto katne na ki nongiohskhim kila pynpaw baki kwah synniang pisa lem ban shna ia ka surok hala ki jong ki Shnong hynrei naba ki kyndon kim shah satia, la kyrpad ia u BDO ba kin pynshai ia kine ki nongioh jingmyntoi.
Ha ka jingiakren la pynpaw ruh ba ki don haduh 67 tylli ki syrok kiba ka jingjngai ka kot 234.911 Km bala bei pisa lyngba ka Pradhan Mantri Gram Sadak Yojana (PMGSY) hapoh ka District.
Napdeng kine, la pyntip ba 40 tylli ki surok ki dei kiba la dep trei pyndep hynrei haduh 27 tylli ki dei kiba dang sahteng. Halor kane, ka MP kala bthah ia ka Tnad ba pyntreikam ia ka PMGSY ba kan leh eiei pyrshah ia ki contractor kiba khlem pyndep ia ki project bala bynshet ha ki kat kum ka por bala buh.
Ha kae ka jingialang, la shong bishar ruh halor ka jingpyntreikam ia ka Jal Jeevan Mission (JJM) bad ka Swachh Bharat Mission jong ka Ministry of PHE, ka Meghalaya Health Sector Strengthening Project (MHSSP) bad ka Pradhan Mantru Bharatiya Jan Aushadhi Pariyojana (PM-BHIM) kiba hap hapohka Tnad ka Koit ka Khiah, ka Poshan Abhiyan kaba hap hapoh ka Integrated Child Development Services (ICDS), Pradhan Mantri Krishi Sinchai Yojana (PMKSY) jong ka Tnad Soil and Water Conservation bad kumjuh ruh ia ka Antyodaya Anna Yojana (AAY) bad ka Public Distribution System (PDS) for Priority Household (PHH) jong ka Tnad Supply.
