Shillong, Rymphang 29: Ka Khasi Students Union (KSU) Laban Circle hynne ka sngi Palei, kala shim ia ka sienjam ban leit shna iing na ka bynta ki Khasi bym don iing ha Maxwelton Estate Laban, Shillong kum ka jingleh markylliang pyrshah ia ka Sorkar Jylla.
Ka KSU Laban Circle kala shim ia kane ka sienjam ban phah khubor sha ka Sorkar Jylla ba kim kwah ba ki Iing be-ain jong ki bar jylla kin don ha kane ka jaka.
Ka KSU kala aipor 15 sngi ia ka Sorkar ban kyndang lut ia ki Iing jong ki bar jylla ba shong beain bad ri masi ha Maxwelton Estate, ka jaka kaba heh kumba 9 acre.
Ka KSU kala wah ruh ia ki banner ba don ia ki jingthoh ba pynpaw ia ki jingbitar pyrshah ia ka KSU. Kawei na kine ki banner ka thoh “Ka KSU kan ym ailad ia ka Maxwelton Estate ban kylla long Them Mator 2.0”.
Kane ka Seng ki samla pule kala maham ruh ia ki bor pyniaid District ba kim bit ban pynpra ia kine ki Iing ba ka seng kala pynshna na ka bynta ki paid Khasi. “Lada ki bor District ki rai ban pynpra, ngi ruh ngin pynpra lut phom ia baroh ki Iing hapoh ka thain” ong u President ka KSU Laban Circle Rueben Najair.
Ka KSU kala kynnoh ba ki don bun tylli ki iing ba shu shna beain ha kane ka Estate, kiba la shna khlem ka jingbit ne ka jingmynjur jong ka Dorbar Shnong, Kenches Trace, Oxford Rilbong lane kino kino ki bor ba dei khmih.
Dang shen, u Symbud Myntri Rangbah ba khmih ia ka kam pohiing Bah Prestone Tynsong ula ong ba ki briew ba shong ba sah ha Maxwelton Estate kin hap pynkhreh ban lum ia ki tum ki tam bad kynriah na kane ka jaka lada ki dei kiba shu shong beain.
“Ka ain kan ieng rasing bad ka ain kan shim iala ka jong ka lynti bad lada dei ka jingshisha ba ki sah beain, kin hap ban pynkhreh ha kaban mih noh na kane ka jaka” ong u Symbud Myntri Rangbah.
Ka Deputy Commissioner ka EKH kala khot iaken ia ki Nongialam jong ka KSU halor kane ka jingleit shna iing hapoh ka Maxwelton Estate hynrei kane ka jingiakren kam shym la poi shano shano ruh.
Haba kren shaki lad pathai khubor hadien ka jingiakynduh iaka DC, u samla Ruben Najiar u la iathuh ba ka DC kala kyntu ia ka Seng ba kan pynpra noh ia ki Iing kiba ka seng ka shna haba pyntip ba ka jingbym leh eiei ka Sorkar ia ka jingujor ka seng ka dei namar ka daw ba don ka mukotduma hapoh ka Iingkashari.
Ula ong ba ka seng kala ieng skhem ha ka nongrim ba kam treh satia ban pynpra noh ia ki iing ba ka tei namar ka DC kam lahban ai kano kano ka jingkular ban kyndang ia ki bar jylla khamtam kito kiba sah beain ha kane ka jaka.
Une u Nongialam ka KSU ula ong “Ngi la rai ba katba ka Sorkar ka dang slem. Ngi ruh ngin iai tei bad ngin iai pynbun iaki paid Khasi ha Maxwelton Estate”.
Halor ka kam ri masi, ula iathuh baka Deputy Commissioner kala kular ba kan sa bthah ia ka Shillong Municipal Board (SMB) ba kan leit khang noh ia ka kam ri masi ha kane ka jaka, kaba ktah ia ki tyllong um bad ka wah.
