Nongpoh, Risaw 07: Ka jingther u slap mynta la ar sngi lynter hapoh Ri Bhoi District, ka la wanrah ia ka jing shlei um kaba shyrkhei ha u surok bah National Highway 6 ha ka shnong Lumbyrhing hajan Nongpoh kaba la ktah shikatdei ia ki paidbah nong leit nong wan na ka jingdheng kali kaba jur ha kane ka bynta u surok bah bad ruh wat ia ki nongshong shnong namar ka jingnang kiew ka um.
Katkum ka jingtip ba la ioh lum, kane ka jingshlei um ha katei ka bynta u surok bah NH 6 ka la Jia naduh ka miet Jong ka 6 tarik Risaw bad ka um ka la nang kiew nang kiew namar ka jingnang hap u lapbah ha bun ki bynta ka Ri Bhoi District.
Ha kane ka jingshlei um ha u surok bah NH 6 la sakhi ruh bun tylli ki kali kiba la pyrshang ban jam sha shilliang u surok bah ki la sahkut pynban hapdeng ka um namar ka jing khlain jong ka um bad la sakhi ruh ia ka jingdheng kali kaba jur ha kane ka bynta kaba la wanrah ia ka jingeh kaba khraw ia ki nongleit nong wan.
Na ka liang u Rangbah Shnong u Bah Banai Jingsuk Khongdup u la iathuh ba kane ka jingshlei um ka la jia naduh mynnin mynmiet hadien ka jingneh u slap kaba la neh da ki kynta bad ka daw bah halor kane ka jingjia shlei um ka dei namar ka jing thut jong ka muri nala um kaba don ha kawei ka jaka jong u riew shimet.
U la iathuh ruh, na ka liang ki bor pyniaid shnong ki la ia kren bad u trai katei ka jaka u riew shimet ban leh eiei halor katei ka muri um bad ruh na ka liang ki bor ka National Highway Authority of India lem bad ki bor pulit ka Nongpoh Police Station ki la nang trei shitom ban pynrngad ia kane ka um bad ban weng ia ka jingdheng ki kali ha u surok bah NH 6.
Shuh shuh ruh, u la ong ba ha kane ka jingshlei um bun tylli ki longiing ki la mad ia ka jingduhnong namar ka jing rung ka um ha ki thliew iing bad ruh namar ka jingnang kiew jong ka um.
