Shillong Iaiong 29: U Sordar ryngkat ki paid nongshong shnong ka Raid Kongthong, hynnin ka sngi Iew Shyllong, ka 28 tarik u Iaiong 2023, kila pyndep ia ka lehniam lehrukom ban nguh ban dem bad duwai palei ha u Blei Trai Kynrad ne ia ka puja ka pukon ka jongki ia kaba la pynlong hapoh ka madan Niangpyrhai.
Ha ka sngi kaba bud la pynlong pat sa ia ka shad puja, ba wan ban iashim bynta da ki paid ka shnong bad kumjuh na ki shnong kiba marjan.
Kaba kham niar ban iohsngew ka long ka jingpyndonkam iaka ktien Puja ne Pukon khamtam eh da ki paid kiba dang bat dang ksoh ha la ka niam hok tynrai bad haba wad bniah ia ka jingpyndonkam ia katei ka kyntien, ki nongkit nongiabah ia ka shong ka thaw kila pynpaw, “Ba ka daw tynrai ba ki pyndonkam ia ka kyntien puja ne pukon kadei namar ba ha ka jinglehniam lehrukom kaba la long ha ka 28 tarik, ka nguh ka dem ia U Blei Trai Kynrad, ka long da ka lynti jong ka duwai palei, kaba mut ba la shu sei tang da ka kyntien hok u khun bynriew ban shu kyrpad kyrpon beit ha U Blei Trai Kynrad, khlem da leit sha ka shat ka khien, ka khnong ka bishar ban ia khmih ia ki dak ki shin ne ban leh ia kano kano ka knia ka khriam”.
“Pynban ha shwa ban poi sha kane ka nguh ka dem palei, kumba artaiew shwa jong kane ka nguh ka dem, ka da don ka dorbar jong ka Raid ha kaba u Sordar, ki Matabor, ki riewtymmen riewsan bad ki nongiakit nongiabah ia ki kam shong kam thaw, ki leit sha ka shat ka khein, ka khnong ka bishar, ban pynsgew ban pynsngap bad ban ia pan hukum na U Blei Trai Kynrad, ban lah ha kaban pyndep ia kane ka nguh ka dem palei kaba shi sien shi snem” kila pynpaw.
Haba la biang ka jingiapan ia ka hukum, kumta ka Dorbar ka shim ia ka sienjam ban khreh ban pynbna iar sha la ki paid nongshong shnong ban pyntip ia ka sngi ka ia, jong ka nguh ka dem bad ka shad ksiar shad rupa.
Haba phai sha ka nguh ka dem, u Sordar u shim ia ka bynta ban lamkhmat ban shna ia ka duwan ka dupat da kaba siang da ka lamet, nangta bynrap sa ka jingsieh ia ki lai tylli ki tynsong siej ba la pyndap da ka um bad ha uwei pat u shang, la khleh lang ia baroh ki symbai ki rynnai, jong ki har rukom ki jingthung jingtep, kaba kum ki paidbah ka shnong, ki ju rep ju riang ia ki sha la ki bri ki bsah ne lyngkha ki risa ki jong ki.
Ynda haba la dep ban siang ia ka lamet, u Sordar u shim ia ka bynta ban pyndep ia ka jingduwai ka jongu bad lehse ioh u don ka tam ka duna ne ka lait ka duna ha ka jingbuh kyntien ha ka jingduwai, la iarap shuh shuh ia u sordar da kaba pasiaw na kiwei pat ki para riewrangbah ne riewtymmen riewsan ka shnong.
Haba la biang lut ka ka kyntien ka nia ka jutang, la but lang ia baroh ki symbai ki rynai halor jongka lamet bad ruh ban da suid ruh ia ka um na ki tyndong siej bad hadien kane, u sordar u la sa khylliap ia kine baroh ban tyrsat ha khrum jong uwei u maw ba don ha madan Niangpyrhai ba dei ka jaka lehniam.
Marsien dep ka nguh ka dem na u sordar, la dei pat ka pali ban ia shad paidbah, ha kaba la tem ia ka ksing kynthei bad ban shoh ia ka sur ka ksing padiah ha ka siej, hangne naduh ki khynnah rit haduh ba la san la rangbah kynthei bad shynrang ki iashim bynta shitrhem ban ia shad ia kynthih pyllun pyllun ia ka madan.
Kane ka nguh ka dem ka long artad kum shi bynta ban ia pan bad kyrpad ha U Blei Trai Kynrad ba un theh sei ia la ka kyrkhu ka kyrdoh ia u khun bynriew ban san ban plung u symbai u rynai ban dap ban pahuh ka bam ka dih, ban ioh ia ka koit ka khiah, ban ia roi ha ka liang kamai ka kajih ban ioh ia ka shait ka khiah krad khiah stang, ban roi ka jingnang jingtip ryngkat ba U Blei Trai Kynrad un da ri da sumar sukher, ba ioh don ka sabuit ka sakai ka sawbniat sawtyngam, u nongshun u nongpen bad ba baroh ka sniew ka smeh, kin da shah khalah shaba sep jong ka sngi bad ka shnong ka thaw kan ioh tang da ka shongsuk ka shongsain ka im hok im suk bad im palei.
