Shillong, Iaiong 25 : Ka Jylla Meghalaya kala mad ia ka jingkiew ka shit kyr-ang ka Sngi bad ka jinglong lhop ha jan baroh ki District ka Jylla khamtam ha Ri-lum Garo.
Ka Indian Meteorological Department (IMD) Shillong, ha ka sngi Palei kala pyntip ba ka jingshit kyr-ang bad jinglhop ka suinbneng kan dang iai bteng ha kine ki lai sngi ban wan ha kylleng ki jaka jong ka Jylla.
Kat kum ka jingpyntip ka IMD, ka jingshit ba jur eh hynnin ka sngi ka long haduh 34-39 degree Celsius ha kiba bun ki District ka Ri-lum Garo bad ha Ri-Bhoi kala long hapdeng 24-27 degree Celsius. Katba ha Khasi bad Jaintia Hills, ka jingshit kala shu tam ia kaba ju long da 2.9 haduh 5.7 degree Celsius ha ki katto katne ki jaka.
Ha ka sngi Balang, ka jingshit bala thew ha Resubelpara, North Garo Hills kala kot ia ka 39 degree Celsius. Ka IMD kam pat pyllait jingkhein ia ki jaka them jong ka Ri-lum Garo ba kynthup ia ka Mahendraganj, Tikrikilla, Phulbari bad Rajabala kaba ka jingshit ka kot haduh 40 degree Celsius tam.
Ka IMD ka pyntip ba ka jingshit ha Nongbah Shillong hynnin ka sngi ka kot ia ka 27.1 degree Celsius, ka Barapani ka kot 34 degree Celsius, ka Jowai ka kot 26.5 degree Celsius, Nongstoin ka kot 25.8 degree Celsius, Mawkyrwat ka kot 26.1 degree Celsius, ka Sohra ka kot 25.8 degree Celsius bad ka Mawsynram ka kot 24.7 degree Celsius.
Ka IMD ka pyntip ba kane ka jingshit kyr-ang ka Sngi kan dang iai bteng ha kine ki lai sngi ban wan.
