Shillong, Jylliew 01: Ki arngut kiba dang shu dep ban kyntiew kurim kiba na Indore u Raja Raghuwanshi (30) bad ka Sonam Raghuwanshi (27) kiba la wankai sha Sohra bad kine kila jahklep mynta la 10 sngi.
Kine ki shi kurim kila jah naduh ka 23 tarik u Jymmang.
Ka sorkar Meghalaya kala pyndonkam kumba 50 ngut ki briew kiba kynthup ia ki pulit, ka kynhun jong ka SDRF bad kumjuh ia ki trai nongshong shnong ban leit wad ia kine ki shijur kiba la jah. Nalor kane la pyndonkam da ki K9 Sniffer Dogs bad ki Drones ban lap ia kitei ha ki jaka kiba jynjar ban poi.
Ha ka 22 tarik u Jymmang kine ki shi kurim kila poi ha ka shnong Mawlakhiat (Elaka Mynteng) da kawei ka thuk thuk kaba kila shu wai ban leitkai sha Double Decker Root Bridge ha Nongriat. Kila ialam ryngkat ia uwei u nongialam lynti ne u Local Guide u Bha Wansai bad kila iaid kjat 3,000 tylli ki mawkyndon kiba noh ban poi sha ka jaka kaba pawnam ka Living Root Bridges kaba don ha Nongriat, ha kaba kila sah shi miet ha ka Shipara Homestay kaba don ha Nongriat, la pyntip ki ophisar.
Kila mih noh ha ka por 6 baje mynstep ha ka 23 tarik u Jymmang ban leit phai biang sha ka shnong Mawlakhiat. Hynrei ym shim la don mano mano ruh kiban iohi ba kine ki shijur ba kin iaid kjat na Nongriat sha Mawlakhiat ne ban leit shim ia ka thuk thuk kaba don ha ka jaka pynieng kali ha Mawlakhiat, wat hapdeng ka jingjur jong ki nongwan jngohkai. Ha ka 24 tarik u Jymmang u Sordar jongka Sohrarim ula pyntip shaphang ka thuk thuk kaba la shu wan buh bad la ioh jingtip shaphang kitei ki shijur lyngba ka E-Challan ha ka 25 tarik u Jymmang ha ka por 2:30 janmiet. Ki bahaiing bahasem kila ujor da ka ejahar bad la rejistar ia kane ka ejahar, la ong u ADC jong ka Sohra.
Kham hashwa, ha ka 22 tarik u Jymmang kine ki shi kurim kila leit ha Manha Homestay ha Saitsohpen, Sohra ha kaba kila buh ia ki tiar ki tar ki jongki namar ka jingbym ioh ia ka jaka sah bad na ka jingther u lapbah, kila ai iala ka kyrteng bad u phone number hashwa ba kin mih ban leit wad jaka sah shawei pat. Hynrei la ioh jingtip hadien ba kila leit beit noh sha Nongriat.
U Myntri Rangbah ka jylla u Conrad K Sangma ula pynthikna ba ki bor sorkar kila leh kat kaba lah ban wad ia kine ki shijur bad na ka liang ka jongu ruh ula shimkhia ban khmih bniah ia kitei ki jingleit wad.
Hynrei namar ka jingjur slap ha kylleng ka bynta jong ka thain shatei lammihngi bad kaba kham jur eh kadei ha Sohra ha kine ki taiew, kala buh ha ka jingeh ia ki kynhun ban iaid shakhmat ban leit wad ne ban leit rung shapoh khlaw, shajan ki wahduid ne ki lynti iaid kjat ki bapher bapher.
