Shillong, Risaw 03: U Rikman G Momin hynne ka sngi Ba-ar, ula shimti kum u President ba thymmai jong ka Meghalaya Bharatiya Janata Party (BJP).
“Nga la shimti kum u President thymmai. Nga la pynkhreh ban pynkhlain iaka party haka jingiatreilang ki nongtrei jong ka party lane ki karyakartas” la ong u Rickman.
Haba kylli kiei ki mat ba hakhmat eh kaba u don, u Rikman ula ong “Ka kamram jong nga kadei ban pynkhlain iaka party, ka kamram jong nga kadei ban peit iaka party, lait nangta, sa kaei pat”.
U Rickman ula ong baka kam President kadei kaba khia bha bad ula ong “Ngi don 2 ngut ki MLA. Kadei ka jingiatreilang hynrei ka bhah jingioh Vote jong ka Party kala kiew bha bad ha ki snem ban wan, ngin pyrshang ban jop palat 2 tylli ki Seat”.
Ula ong baka Party ka dang ap ka jingbthah naki nongialam ba hakhmat eh na Delhi naka bynta ban sdang ka jingpynkhreh haba iadei bad ka ilekshon MP 2024.
Nalor kane u Rickman ula kam ba ka ka Party ka don haka jingmut jingpyrkhat jong ki paidbah bad dei namar kane ka Party ka don jingkyrmen namar u myntri rangbahduh ka ri u Narendra Modi u iai trei shitom naka bynta ki briew ba duk.
Ula ong ba ka Party haka jingialam jong u kan pynthikna ba ki paidbah ka Meghalaya ki ioh lut ki jingmyntoi naki skhim bala bei tyngka daka sorkar pdeng.
Nalor kane u president ba thymmai ka Meghalaya BJP u Rikman G Momin ula ong ba ka Party ka ieng ban rat dkhong iaki kam bamsap bad naka liang ka Party kan iai bteng ban kren iaki mat halor ki kam bamsap pyrshah iaka sorkar synroplang ka Meghalaya Democratic Alliance (MDA).
“Haba iadei bad ka MDA, kadei ruh ka bynta jong ka Party bad lada don shisha ki kam bamsap, naka liang ka BJP kan iai bteng ban buh ki dak jingkylli namar ka don ka rynsan” ula ong.
U president barim ka Meghalaya BJP u bah Ernest Mawrie ula ong “Ka samoi treikam jong nga kala kut bad kane ka jingkylliang president kadei hapoh Meghalaya, Nagaland bad Puducherry.”
U bah Ernest ula ong ba kadei ka nongrim jong ka Party ban bujli nongialam lada ka samoi treikam kala kut bad ula kyntait ruh iaka jingkynnoh don ki daw kaba la pynlong iaka Party ban weng ia u.
Ula ong ba un iai trei shitom naka bynta ban pynkhlain iaka Meghalaya BJP.
“Ngan iai bteng kum u nongtrei ka BJP (Karyakarta). Ngan trei bad u president ba thymmai ha ryngkat bad ki MLA bad ka party. Ngin pynthikna kumno ban jop haki ilekshon” la ong u bah Ernest.
U bah Ernest ula ong ba ka Party kala rai ban nang pynkhlain shuh shuh iaka Party kum shi bynta ban pynkhreh iaka ilekshon MP Lok Sabha.
“Ngi la rai ban mynta ka kynti ngi don jingthmu ban jop baroh 25 tylli ki Seats napoh ka thain shathei lammihngi (North East). Ki don ki jylla kiba dei ki NEDA bad ki don ki jylla kiba synshar ka BJP. Ngi kwah ban jop lut ki Seat ban wanrah shuh shuh ki kam pynroi hapoh ka thain shathei lammihngi (North East) baroh kawei” ula ong.
