SHILLONG, RISAW 01: U Chief Secretary bathymmai ka Meghalaya u Dr Shakil P Ahammed ula pynpaw ia ka jingkyrmen ia ka lawei jong ka jylla, da kaba pynpaw ia ka jingskhem jingmut shaphang ki jingthmu (Plan) jong ki kam pynroi kiban iaid slem kiba thmu ban kyntiew ia ka kam pynroi haduh u snem 2032.
Haba shimti ia kane ka kyrdan kaba thymmai, u Dr Ahammed ula kular ban btin lynti ia ka jingpyrshang ka jylla ban pynurlong ia ki thong ki jong ka.
Katkum ka jingong ka jongu, ka jingthmu (Plan) kiba la kdew da u Myntri Rangbah ka jylla u Conrad K Sangma, kala kdew ia ka lynti iaid kaba shai kdar na ka bynta ka roi ka par jong ka jylla.
“Kum uwei na ki dkhot ba lah rangbah ha ka kynhun, ngan pyrshang ban bting lynti ia ki, kaban long kaba kloi, sted bad kaba bha hapoh ka jinglah ka jong nga. Nga skhem jingmut ba ka kynhun baroh kawei kan trei shitrhem, trei thikna bad khamtam hapoh ka jingialam jong u Myntri Rangbah bad ki myntri sorkar, ngin lah ban pynurlong ia ka” ong u Dr Ahammed haba iakren bad ki nongthoh khubor ha ka sngi Baar.
Haba jubab ia ka jingkylli, u Dr Ahammed ula pynpaw ia ka jingdon ia ki kabu ban iohkam iohjam ha ka liang ka Finance khamtam eh ha ka Fintech bad Accounting. Ula banjur ba ka jylla kala trei ha kata ka rukom jong ka jingthmu ha ki liang ki bapher bapher, ia kaba yn sa khmih bniah bha ban ithuh ia ki jaka kiba don ki kabu bad ban ai jingkyrshan.
Na ka bynta ban pynbha shuh shuh ia ka rukom treikam hapoh ka jylla, u Chief Secretary bathymmai ula pynpaw ia ka jingkyrmen skhem halor ka jylla Meghalaya ba ka long ka jaka kaba biang tam ban treikam. U don ruh ia ka thong ban pyndep ia ki thong kiba la buh ia kiba la dep ban kdew bad ban iatreilang bad ka kynhun ban pynurlong ia ki.
Ka jingpynleit jingmut kan long halor ki buit treikam kiba lah ban seisoh kumba la pynbna da u Myntri Rangbah ka jylla ban pynthikna ba man la ki jingthmu bad ki projek kin sei ia u soh ka jingjop, ula pynkut.
 jong ki kam pynroi kiban iaid slem kiba thmu ban kyntiew ia ka kam pynroi haduh u snem 2032.){kind=link}