Shillong, Jylliew 09: Ka Sonam Raghuvanshi, 30 snem ka rta, kaba la suba jur ba kadei kaba la lamkhmat ha kaban pyniap ia la u jong u kurim u Raja Raghuvanshi ha ka jingwankai shi kurim (Honeymoon) sha Meghalaya, kala shah kem ha ki pulit jongka Ghazipur ha ka jylla Uttar Pradesh.
La lap ia ka, ha kawei ka jaka bam, ha ka por ba kala leit ban pyntip sha la ki bahaiing bahasem bad hadien kane kala shah kem noh.
Hadien ka jingshah kem, la ialam ia ka Sonam ban shah khmih ha kaba iadei bad ka koit ka khiah ka jongka ha ka Hospital ha Ghazipur. Mynta ka miet yn sa ialam noh ia ka sha Patna da ka kali bad lashai yn sa wanrah ia ka sha Shillong, ha kaba yn sa ialam ia ka hakhmat jong ka iingkashari District Shillong Court.
Ki pulit ka Meghalaya kiba la lam ia ka jingtohkit kila phah ia ka kynhun sha Ghazipur ban shimti noh ia ka Sonam.
Ki thmu ban mih da ka liengsuin na Patna sha Guwahati ha ka por 12:55 mynmiet ban wan pat da ka kali sha Shillong.
Katkum ka jingiathuh ki pulit, ka Sonam kala shu wai ia ki 3 ngut ki nongpyniap briew ban pyniap ia u kurim u jongka u Raja Raghuvanshi, namar ba kala don ia ka jingiadei bad jingieid bad u Raj Kushwaha.
Ha ka jingtohkit la phla ba ka Sonam kala iakren man la ka por bad u Raj Kushwaha, uba la don ia ka bynta kaba khraw ha kaban pynwandur ia ka jingpyniap.
5 ngut ki briew kynthup ia ka Sonam bad u Raj Kushwaha, kila shah kem ha kaba iadei bad katei ka kam sniew.
Ki bahaiing bahasem ka Sonam kila pynpaw ia ka jingkyndit bad ka jingbym sngewkah ngeit halor ka jingdonkti lang ka jongka ha ka kam pyniap briew. U Kpa jongka u Devi Singh, ula dawa ba dei ban phah tohkit ha ka CBI halor katei ka jingjia bad kam ba ka khun ka jongu kadei kaba luilui bad kala shah pynngat jubor.
Ha kawei pat ka liang, ki bahaiing bahasem jong u Raja kila sngewsih kthang halor ka jingduh noh ia la u khun bad ngeit skhem ba ka Sonam kadei ban shah pynshitom jur lada shem ba kala leh ia katei ka kam bymman.
