Nongstoiñ, Nailur 18: Uwei u heprit u ba la tip kyrteng kum u Donald Marthong 10 snem ka karta, u la shah jied ha ka Minerva Academy Football Club Punjab ban shah pyntbit ha ka jingïalehkai kynjat bol.
Utei u heprit udei u khun jong u bah Franco Puweiñ bad ka kong Daplin na ka shnong Risiang jong ka thain Maweit West Khasi Hills District, kawei na ki shnong kaba dang sahdien shibun ne kaba dang nongkyndong bha ha ka thain.
La ong ba utei u heprit nalor ba u don shisha ïa ka sap ban ïalehkai kynjat bol, u dei ruh u ba la paw bha ha ka marathon namar u ju long ba nyngkong man ka por ba u ju leit ban ïashim bynta ha ka kyrdan jong ka thup kiba hapoh ka 14 snem ka karta. Ym tang katta hynrei u don ruh ka sap ban shad, ban rwai, ban leh birïa bad ban leh beat box.
U kpa jong u heprit u la ong ba u Donald u dei u khun u ba 7 na ki shipara, u dang shong Class V bad leit skul ha la shnong. Hynrei ka por ka la ïalam hi kumno ym lah ban sngewthuh, ba mynta u la shah jied ha ka club kaba heh jong ka jylla Punjab. Hooid ki briew ki ïathuh ba u khun u don shisha ïa ka sap, hynrei u kpa te u shu don tang ban ai mynsiem.
