Shillong, Rymphang 14: U Myntri kam pohiing ka ri u Amit Shah ula aiti ia ka lama jong ka Indian Olympic Association (IOA) sha u Myntri Rangbah ka Meghalaya u Conrad K. Sangma ha ka jingpynhap pyrda ia ka 38th National Games kaba la long ha Haldwani, Uttarakhand.
U Amit Shah ula ong ba ha u snem 2027 ka jylla Meghalaya kan pynlong ia ka National Games ha ka lynti kaba kyrpang bha da kaba kynthup ruh ia ki katto katne ki jait jingialehkai jong ki jylla ka thain shatei lammihngi jong ka ri.
“Watla ia ki jingialehkai yn pynlong ha ka jylla Meghalaya hynrei u Myntri Rangbah Conrad K Sangma u don ia ka jingthmu kaba kyrpang ban pynlong ia ki katto katne ki jingialehkai ha kiwei pat ki jylla jong ka thain shatei lam mihngi. Kane ka long ka sienjam kaba kyrpang bha bad kan iaid shakhmat ha kaban kyntiew ia ka jingiatylli ia ki jylla ka thain shatei lammihngi” ong u Amit Shah haba kren ha ka sngi pynhap pyrda noh ia ka lympung iakob ialehkai.
U Amit Shah ula ai khublei bad kitbok kitrwiang ruh ia ka jylla Meghalaya na ka bynta ban pynlong ia kane ka lympung iakob ialehkai kaba heh tam ha ka ri.
Ha ka sngi pynhap pyrda ia ka 38th National Games ha Uttarakhand, la iadonlang ka Chairperson ka IOA ka PT Usha, u Myntri ka Sorkar Pdeng uba khmih ia ka Youth Affairs & Sports u Dr. Mansukh Mandaviya bad u Myntri Rangbah ka Uttarakhand u Pushkar Singh Dhami.
Kane ka jingaiti ia ka lama ka long kum ka jingpynskhem ba ka jylla Meghalaya kan pynlong ia ka 39th National Games bad kane ka mawjam kan plie lad ia ka jylla ban pynlong ia ki jingiakob baheh ha u snem 2027, kaba dei ruh ka jingdap 55 snem jong ka jylla Meghalaya.
Ka kynhun na ka jylla kaba la leit hapoh ka jingialam u Conrad K Sangma, ka kynthup ia u Dr. Vijay Kumar D u Commissioner and Secretary ka tnad Sports and Youth Affairs, u President ka Meghalaya State Olympic Association (MSOA) Bah John F Kharshiing ki nongialehkai bad ki Coach na kylleng ki bynta jong ka jylla.
Ka jingdonlang jong kane ka kynhun ka pyni ia ka jingshimkhia lang bad ia ka jingthrang ka jylla ban ioh pynlong ia ka National Games.
Haba kren ha ka jingialang, u Conrad K Sangma ula ong, “Ban pynlong ia ka 39th National Games kan long ka khyllipmat kaba sngewsarong ia ka Meghalaya bad kan pyni ruh ba haduh katno kala iaid ia ka lynti ban pynkhlain ia ki sawdong sawkun kiba iadei bad ka kam ialehkai. Na ka jingdon tang kawei ka ‘Marquee Sports Facility’ ha u snem 2018 hynrei mynta kala palat ia 200 tylli ki jingtei, ka jingkular ka jong ngi ha kaba iadei bad ka kam ialehkai ka long kaba radbah. Ngi lah bei tyngka haduh T.1,200 Klur na ka bynta ban don ia ki jaka ialehkai kiba iaryngkat kyrdan ha ka pyrthei, pynsan pyntbit ia palat 24,500 ngut ki khynnah ialehkai bad la buh ia ka thong ban pynmih ia ki nongailehkai kiban mihkhmat ha ka Olympic ha u snem 2032. Katba ngi dang pynkhreh ia ka lympung iakob ialehkai, ngin pynleit jingmut ha kaban thaw ia kaei kaei kaban sah jingkynmaw shi rta kaban ai mynsiem ia ki nongialehkai ha ki pateng kiban dang wan ban kyntiew ia ka jingdon ka Meghalaya ha ki rynsan kiban long hapoh ka ri”.
Ka jingiengskhem ka sorkar jylla ban kyntiew ia ka kam ialehkai kala paw shai ha ka 38th National Games, ha kaba ki nongialehkai ka jylla Meghalaya kila ioh khur 5 tylli ki takma kaba pyni ia ka jingkiew shaphrang ka kam ialehkai ha ka jylla.
Ka jingthmu ban pynlong ia ka 39th National Games ha Meghalaya ka kular ban long kum ka jingrakhe ia ka jingdon mynsiem ki nongialehkai, ka jingiatylli bad ia ka jingtbit, da kaba wanrah lang ia ki sap bat bit na kylleng jong ka ri bad ka jylla Meghalaya ka don ia ka jingthrang ban thaw ia ka histori bad ban leh ia kaei kaei kaba thymmai ha kaba iadei bad ka kam ialehkai hapoh ka ri India.
 sha u Myntri Rangbah ka Meghalaya u Conrad K. Sangma ha ka jingpynhap pyrda ia ka 38th National Games kaba la long ha Haldwani, Uttarakhand.){kind=link}