Shillong, Lber 20 : U Nongialam bala rangbah bha ka NPP bad MLA ka Resubelpara Timothy D Shira, hynne ka sngi nyngkong, ula shah jied khlem ka jingialeh pyrshah ban shimti sa shisien ia ka shuki Symbud Lamphang (Dy Speaker) ka Iingdorbar Thaw Ain ka Jylla.
Kane kala wan jia hadien ba ki lai tylli ki seng sain pyrthei ba don ha ka Liang Pyrshah-ka Congress, All India Trinamool Congress (AITC) bad ka Voice of the Peoples Party (VPP), kila rai ban nym pynieng kyrtong ban iakhun pyrshah ia u Timothy.
U Timothy D Shira u dei u Symbud Lamphang jong ka Iingdorbar Thaw Ain jong ka samoi ba dang shu kut.
“Naba la ioh pdiang tang kawei ka kyrteng ba thep, nga pynbna hangne ba u Timothy D Shira ula shah jied kum u Symbud Lamphang” pynbna u Lamphang ka Iingdorbar Thomas A Sangma.
Ia u Timothy la pyndon burom da u Myntri Rangbah ka Jylla Conrad K Sangma bad u Nongialam ka Liang Pyrshah Dr Mukul Sangma hadien ba ula shah jied ban shimti ia kane ka shuki jong ka Iingdorbar.
Haba pynpaw ia ka jingsngewnguh ia baroh ki Dkhot kiba la pyni ia ka jingngeit bad jingshaniah ha u ha ka sien kaba ar, u Timothy ula kular ba un pynthikna ia ka jingiada ia ka Iingdorbar jong ka Jylla.
“Nga khmih lynti ruh ban ioh ia ki jingai jingmut kiba tei na baroh ki arliang mamla jong ka Iing” ula ong haba kyrpad ia ki Dkhot ban bat ia ka discipline bad ka burom jong ka Iingdorbar da kaba pyni ia ka akor ha ka jingiatai nia.
U Timothy ula kular ruh ban ai ka jingkyrshan ba pura ia u Lamphang ka Iingdorbar bad ong “Ka dei ka burom bad ka kabu ban iadonlang ha kane ka rynsan bad phi. Nga ai khublei ruh ia u Blei uba la kyrkhu (ia kane ka Iing) kaba u Thomas ula bat ia ka shuki Lamphang, Timothy kum Symbud Lamphang bad u Bah Paul kum u Myntri”.
Haba kren ha ka jingialang pyndon burom ia u Timothy, u Conrad ula ong “Nga kwah ban ai khublei ia u (Timothy) halor ka jingshimti ia ka shuki Symbud Lamphang. Ka jingshisha ba u shah jied da ka jingiamon lang baroh ka pyni ia ka jingpdiang jong baroh ki Dkhot ka Iing ia u Timothy.
Haba pynpaw ba u Timothy ula don ia ka jingshemphang ban pyniaid ia ka Iing, ula ong “Nga thikna ba ha ryngkat bad phi (Lamphang) bad ma u kum u Symbud Lamphang, phin lah ban pyniiad ia ka Iing ha ka rukom kaba dei”.
Haba iasnohkti lang bad u Nongialam ka Iing, u Nongialam barim ka Liang Pyrshah bad MLA ka AITC na Songsak Dr Mukul Sangma ula ong ba u da kwah eh ba u Timothy un shong sha ka liang jong ka Liang Pyrshah. “Nga kmen bha ban ioh ia u kum u Symbud Lamphang” ula ong.
U Lamphang barim bad MLA ka AITC na Nongthymmai Bah Charles Pyngrope, Myntri ka Sorkar Bah Paul Lyngdoh, MLA ka Congress na Mylliem Bah Ronnie V Lyngdoh bad kiwei, kila iashimbynta ha ka jingpyndon burom ia u Timothy halor ka jingshah jied kum u Symbud Lamphang.
