Shillong, K’lyngkot 12 : U Myntri ka Tnad Pule Puthi Bah Lahkmen Rymbui ha ka sngi Nyngkong ula bthah ia ki ophisar jong ka tnad ban iakynduh ia ka Pro-Vice Chancellor ka North Eastern Hill University (NEHU) Tura Campus ban wad ia ki lad ki lynti ha ka ban pynbeit ia ki kynrum kynram kiba la suhthied ha ka skulbah na ka jingpep trei u Vice Chancellor u Prof P Shukla la palat 422 sngi.
U Bah Rymbui ula bthah ia katei hadien ka jingialang bad ki kynhun jongka NEHU kiba kynthup ia ka NEHUTA, NEHUNSA, NEHUSU bad KSU, kiba la kyntu ia u ban tuklar lem ia katei ka kynrum kynram.
Kine ki kynhun kila kyrpad ba ka Pro-VC jongka Tura Campus kadei ban shimti noh ia ka kam kum ka Acting VC ne ban iehnoh kam, ban plie lad ia ki Professor kiba la ih ha ka kam ban shimti ia katei ka jingkitkhlieh bad ban pynneh pynsah ia ka jinglong jingman jongka Skulbah.
“Nga lah bthah ia ki ophisar ba kin pynbeit ia ki jingialang bad ka Pro-VC ka Tura ban peit ia kaei ka jingsngew ka jongka, khnang ba ka jingthmu ka sorkar ka long ban peit ba ki prokram, ki samla pule kim dei ban ktah ia ka NEHU, namar lada ka ktah ia ka NEHU kan ktah ia ka jylla baroh kawei khamtam haba bun ki college kidei kiba ka pyniasoh bad ka NEHU bad wat ka scholarship ia ki samla pule ruh kan shah ktah” ong u Bah Rymbui haba iakren bad ki nongthoh khubor.
Haba pynpaw ia ka jingsngewkhia ia ka jinglong jingman ha NEHU, u Myntri ula ong, “Ka jingtreikam ha NEHU kala dkoh lut, ka long kaba eh ban pynbna ia ka result, ban siew ia ka bai bylla, ban mang na ka bynta ki Seminar bapher bapher bad kaba kham kongsan kadei ban pynbna ia ka result bad kiwei kiwei ki prokram jongka NEHU.”
U Myntri ula banjur ba ka sorkar ka buh hakhmat eh ban pynthikna ba ka skulbah kadei ban treikam ryntih khlem da ktah ia ki samla pule
U Bah Rymbui ula phah da ka jingthoh sha u Myntri ka Sorkar Pdeng ha ka 15 tarik u Nohprah ban pynbeit noh shi syndon ia katei ka kynrum kynram.
“Ngan sa pyrshang biang ban don ia ka jingialang bad u khnang ba un ioh ban pynbeit noh shi syndon khnang ba ka rukom treikam jongka NEHU kaba dei ka skulbah kaba donnam ha ri India kan lah ban treikam thikna bad ba kiei kiei kiba iaid ryntih noh baroh” ula ong.
U Myntri ula banjur ia ka jingdonkam kyrkieh ban pynbeit ia katei ka jingeh namar kala ktah ia ki samla pule bad ia ki college kiba pyniasoh bad ka NEHU.
“Ngim lah ban ap ia ki kam kiba man la ka sngi (kin shah ktah)” ong u Bah Rymbui bad ka iengskhem ba ula bthah ia ki ophisar ban iadonbynta ha ka jingialang bad ka Pro-VC ban wad ia ki lad ban pynbeit ia katei ka kam ban pynthikna ban pynduna ia ka jingshah ktah ki kam kiba iadei bad ka pule puthi.
“Ki kyndon ain ne Statutes jongka NEHU kam don ia ka bor ban thung ia u Acting VC… ba bat ia katei ka kam mynta dei ban hiar shuki noh, kumba la leh da u Prof Umdor, ban plie lad ia ki Professor kiba la ih ha ka kam ban shimti noh ia ka kam” ula ong.
Ula ong shuh shuh, “Ka jingpynslem kala ktah ym tang ia ki samla pule ka NEHU bad kito ki College kiba la pyniasoh bad ka NEHU, kan ktah ruh ia ka jingpynbna Result bad ia kiwei kiwei ki kam”.
Ha kaba iadei bad ka jinglong jingman jongka jingtohkit kaba la thung da ka sorkar pdeng, u Bah Rymbui ula ong ba kaiphod jingtohkit kaba la lamkhmat da u Prof DP Singh kadei kaba ym pat pynbna eiei.
“Ka Ministry kala shimkhia bha bad dei na katei ka daw ba kila thung ia ka kynhun tohkit hynrei haduh mynta ngim tip eiei shaphang kaei kaba don ha katei ka kaiphod”.
U Myntri ula pyntip ba u Myntri Rangbah u Conrad K Sangma ula shimkhia ban iakren bad ka sorkar pdeng ban pynbeit noh shi syndon ia katei ka kynrum kynram.
“Ngi hap ban shimkhia ia ki artylli ki mat, ka jingjia kaba mynta bad ka jingpynbeit kaba shi rta” ula ong bad ka kyntu ban shimkhia tyngeh ban pynneh ia jinglong jingman jongka skulbah NEHU.
 Tura Campus ban wad ia ki lad ki lynti ha ka ban pynbeit ia ki kynrum kynram kiba la suhthied ha ka skulbah na ka jingpep trei u Vice Chancellor u Prof P Shukla la palat 422 sngi.){kind=link}