Shillong, Nohprah 17 : U Myntri ka Tnad Pule Puthi Bah Lahkmen Rymbui ula kular ba ka Sorkar Jylla kala shimkhia ban leh eiei ha kaban pynbeit ia ki jingeh kawei hadien kawei,haba buh hakhmat duh ia ka bha ka miat ki nonghikai, ki khynnah pule bad ka kam pule dangle baroh kawei.
“Ngi la kular ban pynlait ia ka scholarship shuwa ka Khristmas, bad ngi lah leh ia kata. Ngi la iapynbeit ruh ia ki jingeh ki deficit bad ka jingsiew DA ruh yn sa pynbeit noh shen, lehse ha ka 19 tarik Nohprah” ong u Bah Lahkmen haba iakren bad ki nongthoh khubor ha ka sngi Balang.
U Myntri ula pynpaw ruh ia ka jingkut jingmut ban leh eiei na ka bynta ki nonghikai SSA, Adhoc bad ki nonghikai Hindi, da kaba pynpaw ba ka Tnad ka dang pynkhreh ia ka rukom siew ba thymmai bad yn sa pyntreikam noh shen ia ka.
Halor ka kam ba iadei bad ki Nonghikai bala don ha ka kam, u Bah Rymbui ula ong “Ngi la pyrshang ban leh eiei halor kane. Ka hukum ka Iingkashari Supreme Court ha ka 1 tarik Nailar kala pynlong kongsan ia ka TET, hynrei ka NCTE kam lah ban pynkylla ia ka rule. Ngi la thoh sha u Myntri ka Sorkar Pdeng ban pynkylla ia ki kyndon ne policy ka NCTE ba kin pyllait noh ia ki nonghikai bala don ha ka kam, ia kiba la thungkam hashuwa ka jingwan ka RTE Act.
Ula pynpaw ia ka jingsngewkhia ba kane ka hukum ka lah ban pynduh kam iaki nonghikai bad ban jur ba ka Sorkar ka dang pyrshang ban pynkohnguh ia ka Sorkar Pdeng ba kan pynkylla ia ki kyndon.
Halor ki kynrum kynram ka NEHU, kaba la iaid mynta la palat shisnem, u Bah Rymbui ula ong “Ka jingsngap jar jong ka Sorkar Pdeng ka long kaba pynlyngngoh bha”.
“Kumno ngin pynbha ia ka pule ka dangle lada ngim sngap ia ki kynhun bapher bapher?” ula buh jingkylli.
