Imphal, Lber 04 : Ka dorbar assembly ka Manipur ka la shim ia ka rai ban pynbna ia baroh ki 60 ngut ki MLA kum ki shipai ha ka jingiakhun pyrshah drok.U Myntri Rangbah (CM) N Biren Singh haba pynbna ia kane ka jingshim rai mynta ka sngi 4 tarik u la ong ba ka assembly ka la shim ia kane ka rai kum ka sienjam kaba kongsan ha ka thma pyrshah drok ha ka jylla.
Ka jylla ka la shimkhia halor kane ka jingma bad mynta ka la shim ia ki sienjam ban iakhun pyrshah.Na ka liang u CM N Biren Singh u la wanrah ia kane ka jingshim rai da kaba ong; “Ka sorkar ka la sdang ia ka thma pyrshah drok khnang ban weng noh shisyndon ia ki jingeh kiba mih na u drok uba la ktah jur ia ka jylla mynta la bun phew tylli ki snem.”
Ka Manipur ka dei ka jylla kaba la shah ktah jur na u drok namar ka jingdon ia ki jaka khappud ba laitluid bad ka Myanmar.
Na ka liang u CM Biren Singh u la ong ruh ba ka jylla ka la shah ktah jur ha kiba bun ki bynta namar u drok, kata kaba kynthup halor ki kam khaii drok, ka jingdih drok hapdeng kiba bun ki khynnah samla kaba wanrah ia ka jingduh ei jong ki mynsiem briew bad ka jingdon jong ki karkhana pynmih drok nalor kiwei pat.
Nalor kata u la ong ruh ba ka jingrep ia u poppy ha ki thain jaka lum jong ka jylla ruh ka dei kawei na ki mat kaba khia shibun hapoh Manipur, kata nalor ka jingdon ia ki jaka khappud kiba ioh ban rung ban mih laitluid bad ka Myanmar.
Shuh shuh u Biren Singh u la ong ruh ba imlang ka sahlang bad ka lawei jong ki khynnah kan shah ktah jur kat haduh ba yn ym lah ban khyllie pat lada ym lah ban rat dyngkhong ia u drok ha kane ka kynti kaba mynta, kata watla na ka liang ka sorkar ka la trei borbah bad shim ia baroh ki sienjam ban khanglad ia ka jingwan rung jong u drok hapoh ka jylla.
Ula ong ruh ba baroh ki paidbah, ki iingbishar, ki bor sorkar, ki nongmihkhmat bad kiwei pat kiba ia don bynta ha ki jingtreikam kiba iadei bad u paidbah ki dei ban ai ka jingiatreilang khnang ban lah ban pynkut shisyndon ia ki jingeh kiba mih lyngba u drok.
Ia katei ka rai ba la tyrwa da u CM Biren Singh la mynjur da baroh ki dkhot jong ka iingdorbar hadien ka jingiamir jingmut lang.
