Shillong, Lber 25 : Ka Kyrtong ka NPP na Shillong constituency Kong Ampareen Lyngdoh ha ka sngi Nyngkong, kala ong ba ka sain pyrthei kala nang san ha Jylla da ka jingshimrai jong ka BJP ban kyrshan ia ki kyrtong ka NPP na Shillong bad Tura ha ka elekshon Lok Sabha ban long ha ka 19 tarik Iaiong.
“Nga sngew ba ka dei ka jingjop ia ngi namar kam pat ju jia mynno mynno ruh ba kin (BJP) ithuh ia ngi naba ki ju iakhun pyrshah ia ngi hynrei khmih mynta ka sain pyrthei hangne kala nang san” ong ka kong Ampareen.
Kala ong ba kum kine ki jingkyrshan kim ju wan ha ka elekshon MLA naba ki ruh kum ka party ki kwah ioh ia u nombor haba bynrap ba ka BJP kala khein jingkhein bha haba buh ha ka jingmut jingpyrkhat ban ioh thaw ia ka Sorkar kaba skhem.
“Nga tip ba ki nongkyrshan ka NPP bad kumjuh ruh jong ka BJP kila lyngngoh namar ngim pat ju iohi ia kum kane ka kam sain pyrthei. Haba nga peit ia ka thong ban ioh ia ka Sorkar kaba skhem, ka BJP kala phah ia ka khubor kaba shai sha ka Jylla lyngba u Myntri Rangbah ba kin hap ban sngap ia ka jingangnud jong ka Jylla bad kaei kaba ki nongialam jong ngi ki dawa” ong ka kong Ampareen.
Halor ka jingkynnoh ba ka NPP bad ka BJP ki dei kajuh, kane ka kyrtong ka NPP kala ong “Kito ki bym vote ia ka NPP kin ong bun kiei kiei. Phi la iohi ha ki social media kumno ba ki kawang maw ia ngi. Hynrei nga ong ba ngim dei ban don ka jingartatien. Ha ka jaka ban pynpait pynpra ha Jylla bad rem, kan bha shibun ba ki (BJP) la shim ia kum kane ka rai khnang ba ngi ruh lashai ynda ngi la leit sha Parliament kin sa ithuh ia ki MP na Meghalaya, ka dei namar jong ngi ba ngim khlem bh kyrtong. Kumta, nga sngew ba ka dei ka jingpynithuh kaba khraw eh ia ngi”.
Haba pynpaw ba da lei lei ruh kan ym rung sha ka BJP, ka kong Ampareen kala ong ‘Lada phi ong ba nga dei BJP, nga ong haphi ba ngan ym long BJP da lei lei ruh. Lada nga kwah leit rung BJP, nga la dei ban rung shuwa ka elekshon 2023. Ngam lah ban rung namar nga la iohi ia katto katne ki nongrim treikam jong ka BJP, ki bym iahap bad ka bha ka miat jong ki paid riewlum ka jylla”.
Haba pynpaw ia ka jingdonkam ba ki seng sain pyrthei ka Jylla ki dei ban shim nuksa na ki seng sain pyrthei nabar ka Jylla, ka kong Ampareen kala ong “Ki seng sain pyrthei ka Jylla ki dei ban shim nuksa na ka rai jong ka BJP. Nga kyrmen ba kane kan dei ka jinghikai bala pyni da ki seng sain pyrthei na shabar ka Jylla ba kumno ngin leh politics. Lada baroh ki kyrtong kila iatulli ha u 2023 bad kiar ha kaban thaw ia bun tylli ki seng sain pyrthei, kane kan iarap ha kaban pynioh ia ka Sorkar kaba skhem. Ong kat kaba phi ong ngi sngew ba kane ka dei ka lynti ba hap jam shakhmat” kala ong.
Haba kylli, kane ka kyrtong ka NPP kala ong ba hashuwa ka rai jong ka BJP ban kyrshan ia ka NPP, kala dep ban iakren bad ki briew ka BJP, UDP, HSPDP, KHNAM bad kumjuh ruh ka TMC/
“Nga la pyrshang kat kaba lah. Nga la pan ia ka jingkyrkhu na baroh ki MLA barim. Balei ba ngan ap ia ka party ba kan pynbna. Nga la kyrpad ia ki ba kin vote ia nga” kala ong.
“Nga la iakynduh ruh ia ki briew ka TMC bad nga kmen bha ba ha ki katto katne ki constituency, ka TMC kala ai ka jingkyrshan ia ngi namar ka party (TMC) ka khlem ioh ia kano kano ka jingbthah khamtam na u Nongialam kum u Bah Charles Pyngrope bad kiwei kiwei, ki bym don shuh ha ka TMC: kala bynrap.
