Guwahati, Naiwieng 15 : Ka kynhun seng lehnoh kaba la shah khein beain, ka ULFA(I) kala shim ia ka jingkitkhlieh ha kaba iadei bad ka kam thombor pyrshah ia ki shipai kiba dang pynlong ka jingiaid pahara hapoh Tinsukia district ha ka thain mihngi ka Assam kaba la jia hynnin ka step sngi Nyngkong.
Ka ULFA (I) lyngba ka email ba la phah sha ki lad pathai khubor mynta ka sngi kala ong ba ia kane ka kam thombor ba la tip kum ka ‘Operation Lakhipathar’, la leh shibynta ban rakhe ia ka sngi jong ka jingpyrshah ne ka ‘Protest Day’, ia kaba kane ka kynhun ka ju rakhe ha ka 28 tarik u Naiwieng.
Katei ka kynhun shipai kiba wan da ki kali kila ngat ha ka jingshah thombor ha ki bynta jong ka lynti surok hapdeng ka Pengeri-Digboi ha ki bynta jong ka Barpathar hynnin ka step sngi Nyngkong.
Ki lehnoh ka ULFA (I) kila pynbthei da u bom IED pyrshah ia ka kali kaba lah ban iada na ki bom ba la pynap hapoh khyndew ne ki leading mine protected vehicle (MPV), bad ther haduh kumba 20 ne 30 kuli.
Na ka liang ki bor shipai kila kam ba kam shym la don kano kano ka jingiap ne ka jingmynsaw sha ka liang ka jong ki lait noh ka jingjulor jong ka taiar (puncture) bad ha ka jingpynphai kuli markylliang uwei u dkhot ka ULFA(I) ula ngat ha ka jingmynsaw kaba jur, kata lyngba ki sakhi na ka jinglapdien ia ka snam kaba la satah ha katei ka jaka khlaw.
Hadien katei ka jingjia, ryngkat ki bor pulit la pynlong ia ka jingkhynra kaba jur ha katei ka jaka ha ryngkat ka jingiarap lem da ki ksew kiba la ioh jinghikai hynrei kim shym la lapdien satia ia ki dkhot jong katei ka kynhun lehnoh, ong u nongaiktien ki shipai.
Kine ki lanot kiba la phet krad kila iehnoh ruh shadien ia u remote, ki beteri, waiar nalor ka bam ka dih, ula ong shuh shuh.
Na ka liang ka ULFA(I), ha kawei pat ka bynta kala kam ba katei ka jingthombor kala wanrah ka jingjulor ia katei ka kali shipai bad pynmynsaw ruh ia bun ngut ki shipai.Watla katta kane ka kynhun kam shym la kdew ha kaba iadei bad ka jingmynsaw sha ka liang ki dkhot jong ki.
Ka ‘Protest Day’ jong ka ULFA(I) ka long shi bynta kynmaw ia ka jingkhynra jong ki bor shipai pyrshah ia kane ka kynhun seng lehnoh lyngba ka ‘Operation Bajrang’ ha u snem 1990.
