Shillong, Nohprah 04: Ka Sorkar Jylla kala shah bthah ba kadei ban shimkhia mardor bad ban shim ia ki sienjam kiba kongsan ban tehlakam ia ka jingtih dewiong be-aiñ ha ka jylla.
Ha ka Interim Report kaba 26, ka Committee jongu Justice Katakey kala ai ia katto katne ki jingbthah ban shim ia ki sienjam kiba dei ban leh kiba kynthup ban leh ia ka Aerial Survey ne jingkhmih bniah nalor suiñ, ban tap noh ia ki par dewiong kiba plie bad ban pyntreikam ia ki lad ki lynti ban ai ia ki skhim ban bit ban biang ki nongtih dewiong.
Ka committee kala banjur ia ka jingdonkam kyrkieh ban pynlong ia ka jingkhmih bniah nalor suiñ ban ithuh ia ki jaka kiba la lum ia u dewiong uba la tih be-aiñ shabar jong ki par dewiong kiba la dep ban ithuh bad kaba palat ia u dewiong uba la dep ban kurup hapoh jongka Mines and Minerals (Development and Regulation) Act, 1957 (MMDR Act).
Ka kaiphod kala kdew ruh ba ka jingdon kum utei u dewïong ka pyni ïa ka jingdon ki kam be-aiñ kaba kynthup ïa ka jingtih, ka jingdie, bad ka jingshalan. Kala pynpaw ba dei ban pyntreikam tyngeh ia ki kyndon jong ka MMDR Act, ban pynthikna ba ia u dewiong ba la tih be-aiñ dei ban kurup bad die lyngba ka jinglilam ban ia kaba don sah ha ka kti jong ki nongpyniaid be-aiñ.
La pynpaw ia ka jingbun ki par dewiong ha ka jylla, ka Committee kala kyntu ia ka sorkar ban pynsted ban khang ia kitei ki jaka ha ka rukom iakhun ia ka thma. Katkum ka jingtip na ka North Eastern Space Applications Centre (NESAC), tang ha East Jaiñtia Hills District ki don palat 22,000 tylli ki jaka tih dewiong, kiba bun na kine ki dei kiba dang treikam, kiba la iehnoh ne kiba lah ban pyntreikam biang.
Ka committee kala ai jingmut ruh ban die noh mardor ia u dewiong ba la ioh kurup hapoh jongka MMDR Act, da kaba ioh jingbit pat na ka iingkashari. Kala ai jingmut ban pynkynriah noh ia u dewiong uba la kurup sha ki jaka buh dewiong ba long pdeng khnang ban iada na ka jingtuh ne jingjah. Nalor kane, kala kyntu ïa ka Coal India Limited ban pynlong shuh shuh ïa ki jingdie lilam ïa u dewiong ba la pynshisha bad bishar biang da kaba iaid katkum ka hukum jong ka ka Supreme Court kaba la pynmih ha ka 3 tarik u Niatung 2019.
Ka kaiphod kala banjur ia ka jingdonkam ban pyntreikam mardor ia ki skhim sorkar kiba la mynjur ban pynbiang ia ki lad kamai kajih na ka bynta ki nongtih dewiong bad kane ka long, kaba donkam ban khanglad ia ki nongtih mawshun ban leh ia ki kam be-aiñ ba kin ioh ban im.
