Shillong, Jylliew 24 : Ka Iingkashari Meghalaya High Court kala shim bishar (suo motu) ia ka jingpom dieng pathar ha ka thain Lawsohtun, East Khasi Hills District.
Kane kala mih ha ka por ba shong bishar ia ka Public Interest Litigation (PIL) kaba la kyrpad ban pynsangeh ia baroh ki jingpom dieng beain ba payhar ha ka thain Lower New Colony, Laitumkhrah.
Ka division bench ba kynthup ia u Chief Justice IP Mukerji bad Justice W Diengdoh ha ka hukum kala pynpaw ia ka jingsngewkhia kaba jur bad jinglynngoh ban iohsngew ia ka jingiathuh jong u nongiasaid ain u nongmudui, Paul, Senior Advocate, ba ka jingpom dieng pathar kala pynkylla dur ia ka jinglong ka jaka bad ka mariang ha ka thain.
Ka Iingkashari kala bthah ia u nongmudui ban file ia ka affidavit ban ioh buh jingthoh bad shim bishar ia kane ka jingjia.
Ka Sorkar Jylla ha ka kaiphod ba aiti ha ka 20 tarik Jylliew 2024, kala pynpaw ba kala dep thaw ia ka State Level Committee ban pyntreikam ia ka hukum ka Iingkashari ha kaban khang ia ka jingpomdieng beain.
Hynrei, ka Iingkashari kala shem ba kane ka Committee kala bynshet pynban ia ka kam sha u Divisional Forest Officer bad leh khyndiat eh nalade halor kane ka kam.
Ka Iingkashari kala bthah ia ka Committee ba kan leit iuhkjat bad jurip ia ki dieng bala ai jingbit da u Divisional Forest Officer bad pynthikna ia ki jingshisha halor kane ka jingpynsngew.
La bthah ia ka Committee ba kan pan ruh ia ka kaiphod na u Divisional Forest Officer ba dei khmih halor ka jingkynnoh ba pom dieng pathar ha ka thain Lawsohtun,
Ka Iingkashari kala hukum ba ym dei ban ai jingbit ban pom ia kino kino ki dieng ne ia ki tnad tad haduh ba ka Committee kala pyndep ia ka kam bala bynshet bad shim ia ka rai lane mynjur ia ki rai da u Divisional Foresy Officer.
Ka Iingkashari kala hukum ia ka nongshah mydi ba kan ai ia ka action taken report hapoh ka 18 tarik Naitung 2025 bad buh ban bishar biang ia ka PIL ha ka 22 tarik Naitung 2025.
 ia ka jingpom dieng pathar ha ka thain Lawsohtun, East Khasi Hills District.){kind=link}